УВЕР ЙОГЫН

Муро марафон – Самарыште

Кугу Отечественный сарыште Сеҥымылан 75 ий темме вашеш Юл кундем федерал округышто илыше-влакым иквереш чумырышо «Мемнан сеҥымаш кечына» муро марафоныш 29 апрельыште Самара область ушнен.

Самара губернийын географий чекше ойыртемалтшын сӱретлалтын, шӱм форман улмаш. А таче тудо Шарнымаш да чап идалыкыште Россий президентын Юл кундем федерал округысо полномочный представительжын аппаратшын темлымыж почеш эртаралтше патриотизм шӱлышан «Мемнан сеҥымаш кечына» акцийыш ушнышо участник-влакын шӱмышт дене иквереш кыра.

Самара область эстафетым Башкортостан Республик деч кугу ӱшан да кугешнымаш дене налын, вет тиде муро дене Юл кундемыште илыше-влак Российысе пӱтынь калыкым сарыште лийше да геройлын кредалше-шамычым шарналташ таратат.  «Мемнан сеҥымаш кечына» муро марафон Мордовийыште стартым налын. 25 апрель гыч верысе ден федерал телеканаллаште, радиостанцийлаште, соцсетьлаште #песнипобедыПФО #нашденьпобеды хэштег-влак дене вераҥдалтыныт да ончыкталтыт. Акцийыш кажне кечын вес регион ушна, а 9 Майыште кумдан чапланыше мурым марафоныш ушнышо музыкальный коллектив-влак мураш тӱҥалыт.

Самара область гыч проектыште калык коллектив лӱмым нумалше  П.М.Милославов лӱмеш кугыжаныш руш хор мастарлыкым ончыкта. Кызыт — ты коллектив ик эн ойыртемалтше да усталык шӱлышан. Лач тудо Юл кундемысе калык-влакын муро поянлыкшым профессионал кӱкшытыштӧ ончыкта.

— Волжский калык хор 65 ий утла ий кугу элнан культур поянлыкшым арален кодымаште да кушкын толшо тукымым патриотизм шӱлышеш куштымаште тырша, — палемден коллектив вуйлаттыше Виталий Натаров. – Тидлан кӧра артист-влак тиде марафоныш ушнаш келшеныт. Ме куанен да кугешнен ты чапланыше мурым муренна, сандене пошкудо регионлаште илыше землякна-влаклан кугу таум ойлена. Мыланна тиде – кугу чап!»

Самара артист-влак муро эстафетым Татарстан Республиклан кусарен.

Куйбышев область гыч фронтыш пел миллион наре еҥ каен. Нунын кокла гыч кажне кокымшыжо мӧҥгыжӧ пӧртылын огыл. Тылыште тыршыше-влакат сеҥымашым лишемдаш чотак полшеныт. Куйбышев «запасыште улшо рӱдола» лӱмым налын. Тидын нерген уло тӱня пален да возен. Тушто чылалан палыме Ил-12 самолётым ыштеныт, Сталин бункерым чоҥеныт. Лач Куйбышев олаште Шостакович шымше симфонийжым возен да калыклан колышташ темлен. Тушечынак Совет информбюро деч Юрий Левитан уло тӱням увер-влак дене палдарен, а 1941 ий 7 ноябрьыште военный парад сар жапысе ик эн волгыдо да тӱнямбал кӱкшытан событийлан шотлалтын.

«Сеҥымаш кече» чеверын чолгыжшо шӱдыр семын волгалтеш да ончыкыжымат элнан историйыштыже волгалташ тӱҥалеш. Тек волжан-влакын мурымо мурышт Российыште илыше миллионло  еҥым иквереш уша да сареш вуйыштым пыштыше да тунамсе Герой-влакым шарналташ йӧным ышта», — палемдат муро акцийыш ушнышо-влак.

  

А.БАЙКОВА ямдылен

 

 

Опубликовать в Одноклассники

Добавить комментарий