24 январьыште Йошкар-Оласе калык прикладной сымыктыш тоштерыште Шернур район Тамшэҥер гыч «Унавий» марий тӱр калык студийын ончерже почылтын.
– Мероприятий Шернур районлан 100 ий теммылан пӧлеклалтын. Ончерыште мемнан уста мастар-влакын кидпашаштым ужына. Нуно мемнан калык тӱвыранам аралат, – каласыш ончерым торжественно почмо годым Шернур район администрацийым вуйлатыше Александр Кугергин.
Шернур рӱдӧ клуб системын декоративно-прикладной сымыктыш шотышто методистше Августа Швецова палемден:
– Нуно шуко тошто тӱрым шымленыт: ожно могай шӱртӧ дене тӱрленыт, могай тӱсым кучылтыныт. Марий ӱдырамаш шканже келшыше тӱсым ужын да тӱрым тӱрлымыж годым тудым кучылтын. «Унавий» шуко ансамбльлан вургемым урга. Латкуд ияш пашан лектышыжым Йошкар-Оласе калыклан аклаш луктыныт.
– Студийыште ме кумытын тыршена: Фольклор пӧртым вуйлатыше Ольга Антропова, мый – калык студийым вуйлатыше да фольклор паша шотышто специалист Алевтина Медведева. 2011 ийыште ме калык лӱмым суленна. Илыш дене тӧр каяш манын, кызытсе жаплан келшыше марий вургемым ямдылена, у материалым да технологийым кучылтына. Йодмаш шуко, сандене паша деч посна огына шинче, – ойла студийым вуйлатыше Эрик Бусыгин.
Тӱвыра, савыктыш да калык паша министерствын калык да конфессий кокласе кыл шотышто пєлкан консультантше Ольга Веденькина палемден:
– «Унавий» студийын кидмастарже-влак калыкым эреак у дене куандарат. Мутлан, тувыр фасон вашталтын гынат, а тамган «шонымашыже» аралалт кодын.
– Кеч концерт, кеч ончер – ме эре полшаш тыршена, – ойла самырык тўрызє Алевтина Волкова. – Мыланем студийыш кошташ моткочак келша, эсогыл отпуск годымат тӱрлем.
«Унавийын» кидмастарже-влакым ончерым почмо годым шукын саламленыт да поро мутым ойленыт. Кидмастар Лидия Веткина, нуным тўрлаш туныктышо,тыге каласыш:
– Шочмо Тамшэҥер ялем гыч поро пошкудем улыт. Мый кидпашаштым, тӱрыштым, вургемыштым икымше пӱшкыл гыч палем. Умбакыжат пашашт сай лектышан, шинчашт эре пўсє, кидышт лывырге лийже. Пӧлек шотеш – шӱртӧ, тудыжо тӱрызылан эре кўлеш!
М.Скобелев
Авторын фотожо
