31 мартыште Марий Эл Республикысе Роспотребнадзор виктемыш кум предприниматель деч палыдыме еҥ-влакын ужармужо (туберкулёз) дене орланыше-влаклан спонсор полышым мошенник семынрак йодмышт шотышто увер пурен.
Мошенник-влак нине еҥлан телефон дене йыҥгыртеныт да Марий Эл Республикысе Роспотребнадзор виктемын вуйлатышыже Светлана Ильгизовна Булатова улам маныныт, вара ужармужо дене орланыше черле-влакым эмлаш спонсор полышым йодыныт, оксам ИП Чуркина А.А., «Витофарм» фирме-влак лӱмеш почмо счётыш колташ темленыт.
Виктем ден тыгай «поро» пашам шуктышо палыдыме еҥ-влак коклаште нимогай кыл уке.
Пагалыме предприниматель ден юридический лица-влак, калык, тӱткырак лийза, мошенникын оптышышкыжо ида логал. Тыгай сынан факт дене тӱкнымек, жапым шуйкалыде, Роспотребнадзор виктемыш (8362) 68-19-97 номеран телефон дене йыҥгыртыза. (8800) 707-61-77 номеран «шокшо линий» телефонат пашам ышта. Эше «ӱшан телефон» уло – (8362) 55-36-76.
М.ИВАНОВА.
