Кызыт уремыште моткочак сай игече шогымо республикысе озанлык-влаклан пасу пашам чулымын шукташышт йӧным ышта.
У Торъял районысо «Первый май» колхозыштат паша ворана. Тӱҥ агроном Анатолий Курбатовын палдарымыж почеш, 16 июньлан икияш шурно пасулаште химический обработкым ыштат – шӱкшудым пытарат. Палемдыме 7755 га гыч кок арня наре жапыште 7116 гектарыштыже ты сомылым шуктеныт. Изарнялан тӱрыс мучашлаш шонат.
— Тачысе кечылан, кушкыжмылан, 6450 тонн сенажым ямдылыме. Тудым тӱҥалтыште Тошто Торъял ферме воктеке оптымо, а кызыт Чӱксола комплекс воктеке шупшыктат, — палдарыш Анатолий Николаевич.
«Первый май» колхозышто эртыше шочмын шудым солаш тӱҥалыныт. Ик кечыште гына 10 тонным ямдылен шуктеныт. Вич бригаде гыч нылытыштыже шудым прессоватлен¸ пӱтырен оптат.
Тыгак канен кийыше пасулашке органический ӱяҥдышым луктыт. Кушкыжмылан 3900 тонным шавеныт.
Л. КАМАЛЕТДИНОВА
