Моско артист-влакын классике сынан музыкым шоктымыштым ындыжым ме республикна деч ӧрдыжкӧ кайыде – виртуальный концерт залыште – ончен кертына.
Тидын нерген шочмын, 8 июльышто, Э.Сапаев лӱмеш опер да балет академический театрыште эртыше брифингыште пален налынна. Республикын тӱвыра, печать да калык-влакын пашашт шотышто министКонстантин Иванов кундемыштына «Тӱвыра» национальный проектын «Цифровой культур» регионысо проектшын илышыш шыҥдаралтмыж нерген каласкален.
— Тидлан чылаже 8 миллион теҥге окса ойыралтын. Кодшо ийын ноябрьыште виртуальный икымше концерт залым Йошкар-Олаште почынна, а тений январьыште Эрик Сапаев лӱмеш опер да балет академический театрыште проектный офисым ыштенна. Мутат уке, тӱҥалме пашаште технике могырым чылажат шонымо семын ыш лек, но тиде ситыдымашым ме кораҥден шуктенна, — палдара культур министр. — Ындыжым виртуальный концерт залым районлаштат почаш шонена. Тыгайже лишыл жапыште Козьмодемьянск олаште Я.Эшпай лӱмеш калык тӱвыра рӱдерыште лиеш. Проектым илышыш шыҥдараш 5,6 миллион теҥге кучылталтшаш.
К.Ивановын палемдымыж почеш, тиде проект республикыште илыше-влакым тӱвыралан, сымыктышлан эшеат шӱмаҥдаш полшышаш. Ончыкыжым тӱрлӧ концертым веле огыл, спектакль-влакымат вияш трансляций йӧн дене ончыкташ тӱҥалына.
— Мутлан, Мариинский да Кугу театр-влакын мастарлыкыштым пӱтынь Россий, тыгак тӱня мучко кинотеатрлаште онлайн йӧн дене ончат. Тыгайым мемнан республикыштат ыштена. Виртуальный концерт залыш пураш лӱмынак абонементым ямдылена, — ойлен министр.
Тиддеч посна С.Чавайн лӱмеш национальный библиотекыштат тошто книга-влакым цифровойыш кусарат, нуным Национальный электрон книгагудыш пуртат.
«Тӱвыра» национальный проектым илышыш шыҥдарыме жапыште Марий Эллан эн шерге да кӱлешан 60 книга цифровой йӧныш кусаралтеш. Тиде проект жапыште электрон вариантыш кусарыме икымше пашалан Несторын «Библиотека российская историческая, содержащая древние летописи» книгаже шотлалтеш.
Алевтина Байкова
Авторын фотожо
