«Марий Эл» газет 2022 ийлан у календарь-влакым савыктен. Фотошто кок уста марий ӱдыр улыт: Розалия Осинова ден Екатерина Кошкина. Марий Турек район Памашъял гыч Розалия дене газетна гоч шошымак палдаренна ыле. А кӧ вес пампалчыже?
Екатерина Кошкина Морко район Шӱргысолаште (Коркатово) шочын-кушкын. Верысе лицейым тунем пытарен. Кызыт Чуваш кугыжаныш университетын историко-географический факультетыштыже шинчымашым пога. Администраций менеджмент, делопроизводство ден кугыжаныш да муниципал кучем архив пашаеҥ специальностьым налеш.
– Катя, ты направленийым ойырен налаш мо таратен?
– Илышым могай профессий дене кылдаш йодыш, кажныжым тургыжландара. Тидлан шагал огыл специальностьым шымлаш логалын. Кызыт тунемме верем келшен толын.
Ала-кӧлан архив паша йокрокла чучеш, очыни. Но тиде тыге огыл. Эртыкым шымлаш пеш оҥай. Мылам поснак увер дене пашам ышташ келша.
Йочам годым Чебоксарыш родо-шамыч деке уналыкеш чӱчкыдын кудалыштынам. Тунамак тушто илаш шонен пыштенам. Тунемме тӧнежым ойырымаште тидымат шотыш налынам.
– Школышто тунеммет годымак пеш чолга лийынат. Мастарлыкет, уш-акылет шагал огыл мероприятийыште тергенат. Кудыжо поснак шарнымашеш кодын?
– Школым шӧртньӧ медаль дене пытарен омыл гынат, шкемым тунемаш йӧратышылан шотлем. Тӱҥалтыш класслаштак тӱрлӧ конкурслашке ушнаш тӱҥалынам. Поснак почеламут конкурсым палемдынем. Тунам иканаште кум почеламутым возенам ыле. Иктыже ава, весыже Мурка пырыс, кумшыжо роза пеледыш нерген лийыныт. Калык ончылно пытартышыжым лудын пуэнам. Кызытат возкалем, но тӱшкашке лукмаш уке.
Тыгак «Илыше классике» таҥасымашыш ушнымем эреак шарнаш тӱҥалам. Тушко мыйым классный вуйлатышем, руш йылме да литератур туныктышо Людмила Викентьевна Григорьева ямдылен: ик йомак гыч ужашым тунемаш пуэн. Конкурсышто шкем сайын ончыктенам, жюриланат келшен.
Проект-влакымат возенам. Обществознаний дене туныктышо Валентина Николаевна Васильева МарГУ ден Волгатехын ты аланыште моштымым тергаш эртаралтше конкурсышкыжо шагал огыл коштыктен.
Но эн ойыртемалтше мероприятийже – «Морко ӱдыр – чевер шӱдыр 2017». Тушко мыйым Коркатово тӱвыра пӧрт ямдылен. Тыгай конкурсышто тиде икымше опытем лийын. Тушто мыйым «Морко ӱдыр – чолга ӱдыр» номинаций дене палемденыт.
Шкем тӱрлӧ аланыште терген ончыман. Чыла вере сеҥымашыш ок шу гынат, налме опыт, сай кумыл ӱмырешлан кодыт.
– Тый тыгак пеш сылнын мурет.
–Люба кокамын ойлымыжо почеш, изи годым мыйым совым кырен мураш туныктеныт. Тӱҥалтыш класслаште хорышто муренам. Школыш музык предметым вӱдаш у туныктышо, Надежда Александровна Семенован толмекыже, ты пашалан шуко жапым ойыраш тӱҥалынам. Тунамак скрипке дене шокташ тунемынам. Ты усталыкем икымше гана Чавайн лудмаште ончыктенам. Надежда Александровна Сергей Чавайнын ик почеламутшылан семым келыштарен ыле. Тушто кокымшо верым налынам. Кокымшо вер шотыштыжо: мурымо дене ты вер эре мыйын: ни ончыко, ни шеҥгеке. Тыге шуко гана лиймеке, икымше вер нерген шонымымат чарненам.
Ик гана англичан йылмым туныктышо француз мурым туныктен. Ты мурым МарГУ-н ик мероприятийыштыже муренам. Тыгак тудын дене интернет конкурслашке ушненам. Адакат – кокымшо вер.
Коркатово лицейын юбилейже вашеш «Морко кундем» ансамбль гыч Юрий Осипов ден «Шуматкече» ансамбль гыч Валерий Петров мурышо ученик-влакым погеныт да ты пайремлан ямдыленыт. Тыге школ пелен ныл ӱдыр гыч шогышо мурышо коллектив «шочын». Шке усталыкнам шуко вере ончыктенна. Йошкар-Оласе Ленин лӱмеш тӱвыра полатышкат миен шуынна. Варажым Коркатово тӱвыра пӧрт пелен мураш тӱҥалынам. Концерт дене тӱрлӧ ялыш коштынна, Колумб лудмашыштат муренна. Клубысо кажне пашаеҥлан таум каласем. Нуно мылам ой-каҥаш дене эре полшен шогеныт, шукылан туныктеныт.
Шкетынат мураш йӧратенам, но ансамбль дене утларак келшен.
– Тений тый студент отряд дене кеҥеж жаплан теҥыз воктеке миен толынат…
– Тыге. Кызыт университет-влак студентлан шкем вияҥдаш, шинчымашым нӧлташ, иктаж вес кундемыш миен толаш, пеш шуко йӧным пуат. Молан пайдаланаш огыл? Студент отряд-влак нерген икымше курсышто пален налынам. «Пегас» сервис отрядым шкаланем ойырен налынам да йодмашым колтенам. Тыге Кабардинка селаш кок тылзылан миен толынам. Верысе пансионатыште пашам ыштенна. Теният тушкак логалынам. Но ты гана уло кеҥежым тушто эртаренам.
Студент-влак дене пеш весела. Паша коклаште шкежат каналтенна. Мотор вер-шӧрым ончен коштынна, пырля погынен, тулото воктене гитар дене шоктен муренна. Ты паша мыланем элнан тӱрлӧ кундемже гыч йолташем-влакым муаш полшен.
– Ончыкылык корнет волгыдо лийже!
– Мыйын фото дене календарьым лукмыланда тауштем. Тиде мыланем, родо ден йолташем-влаклан моткоч кугу куан.
О.МОШКИНА мутланен
