15 октябрь гыч 14 ноябрь марте пӱтынь элыште семынак Марий Элыште Всероссийский калык перепись эрта. Тиде Российын историйыштыже икымше гана цифровой перепись лиеш. Тудым икмыняр семын эрташ йӧн пуалтеш.
Тӱҥ у – тиде «Кугыжаныш услуго» порталыште электрон переписной лаштыкыште шке семын возаш йӧн. Адакшым тудым шкан веле огыл, моло лишыл еҥланат оформитлаш огеш чаралт.
Теҥгече правительстве пӧртыштӧ лийше совещаний лачшымак Всероссийский калык переписьым Марий Элыште эртарыме йодышлан пӧлеклалтын. Тудым регион вуйлатыше Александр Евстифеев вӱден.
– Эн ончычак ме кӱлеш вашталтышым – нормативный документым – региональный базыш пуртышаш улына. Россий Федерацийын правительственный актлашкыже вашталтышым пуртымымат эскерена, – каласен Александр Евстифеев.
Тӱҥ докладым республикын правительствыжын председательжын икымше алмаштышыже Михаил Васютин ыштен. Тушто палемдалтын: регион вуйлатыше Александр Евстифеевын кӱштымашыж дене келшышын межведомственный комиссий пашам ышта. Тудын заседанийлаштыже элын историйыштыже моткочак кӱлешан событийлан ямдылалтме паша кузе кайыме йодыш-влакым каҥашат. Шушаш переписьын ойыртемже нерген калыклан умылтарыме паша ышталтеш. Интернет-переписьым МФЦ-ште посна ойырымо верыште эрташ йӧн лиеш.
Интернет-переписьын тӱҥ ойыртемже – переписной лаштыкым еҥ-влак шканышт йӧнан жапыште возен кертыт.
Вес ойыртемже – историйыште икымше гана перепись планшет дене пайдаланен эрташ тӱҥалеш.
Тудын дене пырля 18 октябрь гыч 14 ноябрь марте перепись ондакысе семынак лиеш. Тунам переписчик-влак пачерла, пӧртла, моло илыме верла еда эртат да Интернет-переписьыш ушныдымо еҥ-влакым йодышташ тӱҥалыт.
Кугу тӱткыш переписной лаштыклаште улшо уверым аралымылан ойыралтеш. Электрон вопросник манмыште улшо йодыш-влаклан вашмут еҥ-шамычын ойлымышт гыч гына возалтеш. Пуымо уверым нимогай документ денат пеҥгыдемдаш огеш кӱл.
Кӧ нигудо йӧнжӧ денат огеш пайдалане, тудо переписной пунктлаште тидым ыштен кертеш. Нунын кушто верланымыштым, кузе да кунам пашам ыштымыштым, телефон номерыштым увер лаштыклаште пален налаш, тыгак Маристатын интернет-сайтыштыже, РФ субъект-влакын, верысе самоуправлений орган-влакын администрацийыштын сайтлаштышт да СМИ-лаште муаш лиеш.
Совещанийыште переписьым эртарымашке студент ден волонтёр-влакым ушаш кӱлмӧ нергенат мутланеныт.
Тидымат палемдыман: переписчик-шамычын посна вургемышт, удостоверенийышт (тудо паспортым ончыктымо годым веле чынлан шотлалтеш) лийыт. COVID-19 деч аралалташ манын, переписьым эртарыше пашаеҥ ден волонтёр-шамыч логотипан маскым, перчаткым чият, тыгак антисептик дене пайдаланат.
Марий Эл Республикым вуйлатышын организаций да
аналитике виктемжын уверже негызеш
Л.Камалетдинова ямдылен
