САМЫРЫК ТУКЫМ

Милена Декина: «Министрын саламлымыже пагалымым ончыкта»

Тӱнямбалне шукертак ӱдырамаш ден пӧръеҥ пашам ойыркалат. Но тачысе саманыште тиде чылаж годым келшен огеш тол, очыни. Кызыт шуко «пӧръеҥ»  профессийыште ӱдырамаш-влак пашам ыштат. Теве Йошкар-Олаште шочын-кушшо чолга марий ӱдыр Милена ДЕКИНА  эше школышто тунеммыж годымак шкаланже ойыртемалтше профессийым ойырен налын. Тений тудо Россий МЧС академийым «шӧртньӧ» медаль дене тунем пытарен. 

– Милена, МЧС-никын пашаже куштылгыжак огыл. Тудлан еҥым утараш, тулыш, вӱдыш пураш логалеш. Тый тидын деч лӱдын отыл?

– Мый Йошкар-Оласе 24-ше №-ан школышто МЧС классыште тунемынам. Садлан могай специальностьым ойырен налме йодыш мыйым тургыжландарен огыл. Корнем вигак МЧС академийыш такыртенам. Мый тушко шкетын каен омыл, йолташем-влакат пырля тунемаш пуреныт. Тылеч посна тукым изам МЧС-ште пашам ышта. А мылам лӱдаш амал уке, пашам тӱрлӧ зданийым пожар лӱдыкшыдымылык могырым тергыме дене кылдалтын.

– Тений дипломым кучыктымо годым  тендам Россий МЧС министр саламлаш миен ыле. Тудым ужмеке, тый мом шижынат?

–Акдемийым коктын «шӧртньӧ» медаль дене тунемын пытаренна, садлан мемнан элнан МЧС министрже Евгений Зиничев саламлаш миен. Мыйым гына огыл, чыланнамат кугешныме кумыл авалтен. Тудын мийымыже академийын студентше-влакым пагалымым ончыкта. А теве академийын тистыжым ончылнына наҥгайыме годым шукыштын шинчавӱд лектын ыле. Ме вузна дене чеверласымым умыленна, садлан кумылна тодылалтын.

– Академий тыглай вуз деч ойыртемалтеш мо?

– Тусо режим армийым ушештара. Поснак рвезе-влаклан неле. Нуно икымше кок ийым Москва воктенсе казармыште илат, салтак илышым тамлат. Но ӱдыр-шамычынат каналташ жапышт шагал. Ме куд шагат эрдене кынелына, капкылнам зарядке дене пеҥгыдемдена, кочкына, построений эрта, вара гына занятийыш каена. Кечывал марте тунемына, кечывал кочкышым ыштена, вара адак тунемына, уроклан ямдылалтына, шым шагат кастене кочкына. Тудын деч вара кок шагат канаш пуалтеш. Малаш вочмо деч ончыч – адак построений. Лу шагат кастене малаш возынна. Шуматкечын илыме пӧлемнам эрыктена.

– Тугеже каналташ, концертыш, дискотекыш миен толаш жап йӧршын лийын огыл?

– Тидым рушарнян але каникул годым ыштыме. Но чыным каласаш гын, икымше курсышто тӱҥалтыш кечыла гычак мӧнгӧ чӱчкыдынак йыҥгыртенам. Ача-авалан нелылыкем нерген каласкаленам, шортынам. Но варажым тунемалтын. Да мылам шкаланемат келшаш тӱҥалын. Жап эртыме семын чон йодмо профессийым ойырен налмем умыленам.

Тыгак тӱрлӧ конкурсыш, таҥасымашке каяш кӱлеш гын, академийыште тореш лийын огытыл, вет ме вузын чапшым араленна. Лачак йодмашым возыман ыле.

– А Москваште илыше марий-влак дене кылым кучен отыл?

Вузыштына «Мыйын изи Родинем» конкурс кажне ийын эртаралтеш.  Тушто ме кундемна, калыкнан тӱвыраже, йӱлаже моло ойыртемже дене палдаренна. Ик ийын мый кочамын тукым изаже, поэт Валентин Колумб, нерген каласкаленам. Почеламутшым ойленам. Вес ийын марий мурым муренна, куштымашнам ончыктенна. Мылам Марий Эл гыч пырля тунемше-шамыч полшеныт. А вургемым мыланна Москваште Марий Эл землячествын еҥже-влак пуэныт. Нунылан кугу тау. Мый шкежат землячествын мероприятийышкыже ик гана веле огыл ушненам. А теве МЧС академийын ончычсо вуйлатышыже, кызыт Россий Кугыжаныш Думын депутатше Иван Михайлович Тетерин академийыште Марий Эл гыч тунемше-влакын илышышт нерген эреак пален шога, ужмыж годым, поро мутым пелешта. Тиде мыланна тунемаш вийым утларак ешарен. Икманаш, тора кундемыштат марий-влак коклаште кыл пеҥгыде.

– Икана тыйым Икымше канал дене ончыктеныт манын ушештарышыч. Тиде кунам лийын?

– Академийнан студентше-влак Утарышын кечыжлан пӧлеклалтше концертыште хорышто муреныт. Мыят нунын коклаште лийынам. Мероприятийым телевидений войзен. Родо-тукымем мыйым шуко еҥан хорышто ужын шуктен да варажым, мылам йыҥгыртен каласен. Вот тыге Икымше канал дене мыят «чолгыжынам» (шыргыжалеш – авт.)

Кумданрак — «Марий Эл» газетын
2018 ий 24 августышто лекше номерыштыже лудын кертыда.

Лидия ШАБДАРОВА.

Опубликовать в Одноклассники

Добавить комментарий