8 майыште Чарла кремльыште «Ме шарнена. Мы помним» кокымшо гана бард муро да позий фестиваль лиеш.
Тудым Марий тӱвыра рудер эртара. Организатор-влак тушко автор да мурызо, поэт да творческий коллектив-влакым ушнаш ӱжыт. Ончылгоч йодмашым пуэн шуктен огыдал гынат, участник лийын кертыда. Шкендан але вес автор-влакын почеламутыштымат лудаш кумылан-влакым вучат. Муро але почеламут Кугу Отечественный, моло сар дене кылдалтше, шочмо элым йӧратыме шулышан лийшаш улыт. Фестиваль 17 шагат кастене тӱҥалеш. Сеҥше-влакым ойыраш огыт тӱҥал гынат, кажне участниклан дипломым кучыктат. Кодшо ийын ты фестивальыш коло наре участник ушнен.
С.Носова
