СТАТЬИ ЯЛОЗАНЛЫК

«МЕХАНИЗАТОРЫН ПРОФЕССИЙЖЫМ МОКТЫМАН!»

 

ойла Советский районысо «Родина» ялозанлык производственный кооперативым вуйлатыше Константин ЧЕРЕПАНОВ

– «Родина» СПК-ым мый 2019 ий гыч вуйлатем. Тылеч ончыч «Земледелец» ООО-н директоржо лийынам, вара икмыняр ий «Онар» ялозанлык предприятийын исполнительный директоржылан ыштенам. Кызыт вуйлатыме предприятийнан 2100 гектар курал-ӱдымӧ мландыже уло. Тӱҥ шотышто шуко ияш кушкыллан урлыкаш нӧшмым, тыгак пырчан да зернобобовый культурым  ончен куштена. Тений пытартыш ий фуражлык шурным ӱдена, вес ийын тӱрыснек нӧшмым ыштымашке куснена.

Тыршена, йол ӱмбаке шогалына, предприятийна кугемеш, ӱмаште КЗС-ым чоҥышна, тений технике паркна 2 комбайнлан, косилкылан пойдаралте. Мланде, Юмылан тау, шурным кушта, а ме тудым пайдалын кучылташ тыршена.

– Механизатор-влакда ситышын улыт?

– Озанлыкыштына 8 механизатор, 2 водитель уло, адакшым тургым годым сортировкыш пашаеҥ-влакым ойпидыш почеш ӧрдыж верла гыч тарлена. Предприятийна Кельмаксола кундемыште верланен, тыге мемнан деке пашаш Азаново вел гычат, Роҥго могырымат коштыт. Чын, специалист-влак огыт сите. Механизатор-влак ийготышт дене, моло озанлыкысылак, 50 ийым эрталтыше улыт. Но пытартыш кок ий жапшыте шижалтеш, самырык-влакат мланде пашалан шӱмаҥыт. Ме пашадарым тӱлымӧ системым вашталтенна, пашадар кугытым нӧлталынна. Еҥ-влаклан пашам ышташ келша.

– Пашадарым мынярым тӱледа?

– Кокла шот дене шотлымаште 35 тӱжемышкырак шуэш, а шурным погымо жапыште 50 тӱжем теҥгемат налше-влак улыт.

– Ялозанлык отрасльлан ойырымо кугыжаныш полышт шотышто мом каласеда?

– Тыгай полыш уло, мутлан, ӱяҥдышым налаш, ялозанлык техникым уэмдаш окса ойыралтеш. Но вет эре «шукырак лийже ыле» шонет. Пытарыш кок ийыште полыш кугыт ятырлан шагалемын, очыни, пандемийлан кӧра, ончыч ятырлан шуко, шижалтешак ыле, окса ойыралтын. Мыйын вуйлатыме СПХ-н мландыже, каласышым, 2100 гектар, тиде шагал, мый мландым шараш ямде улам, но ик велым «Шойбулакский» АО-н пасужо кия, вес велым – Ленин лӱмеш СПК-н мландыже, кумшо велым – чодыра. Мый 10 гектар мландым муынам, тушто кушшо пушеҥге-влакым куклен, ӱдымӧ-куралме мландыш савырен, оборотыш колташ лиеш. Тиде пашам мый тӱҥалынамат. Но 10-15 сантиметр диаметран куэ-влакым куклаш пашажат нелырак, роскотшат кугурак, кодшо ийын тидлан субсидий ойыралтын гын, тений – уке.

– Ме тендан дене Советский районышто эртаралтше Куралшын кечынже вашлийынна. Тыгай конкурс нерген шонымшада могайрак?

– Ӱмаште Куралшын кечыжым да всероссийский конкурсым Краснодарыште эртареныт, но тушко пандемийлан кӧра логалын кертын огынал, мый 2018 ийыште Суздальыште тыгай таҥасымаште лийынам. Мемнан дене таҥастарымаште, формат йӧршынат весе, тушто тӱрлӧ куатан трактор-влак линейке семын шогат.

Мый Советский районысо депутат-влак погынымашын вуйлатышыжын алмаштышыже улам, ялозанлык йодышым эреак шинча ончылнына кучена. Куралшын кечыжымак налаш гын, вет тудо мемнан районышто веле эртаралтеш, моло районла гыч толшо-влак кӧранен ончат, «меат ыштена» маныт, но вет огыт эртаре. Але налына тыгай примерым, ожно трактристын профессийжым моктышо могай сай фильм-влак лийыныт!  Каласышым, тачысе кечын механизатор-влакын ийготышт 50 ийым эрталтыше, самырык-влакым огына ушо гын, 10-20 ий гыч трактор рульыш кӧм шындена? Ялозанлыкыште тыршыше труженникым, механизаторын пашажым кӱшкӧ нӧлташ кӱлеш. Ялозанлык профессий эн кӱлешан улмыжлан калык уэш ӱшаныже.

Л.СЕМЕНОВА мутланен

Снимкыште: К.Черепанов

М.Скобелевын фотожо

 

Опубликовать в Одноклассники

Добавить комментарий