Марий Элыште илыше азербайджан-влакын кок мер организацийышт пашам ышта. Иктыже — «Азербайджан тӱвыра рӱдер» региональный мер организаций, тудым Иса Агамалиев вуйлата, весыже — Октай Асхерхан Гусейновын вуйлатыме «Марий Элыште азербайджан-влак» калыкле-тӱвыра автономий. Кодшо шуматкечын кокымшо организацийжын еҥже-влак республикысе мер-политик рӱдерыште «йыргешке ӱстелым» эртареныт. Тӱҥ шотышто тушто лишыл жапыште ыштышаш паша, ты калыкын шкешотан тӱвыражым, йӱлажым, йылмыжым арален да вияҥден колтымо нерген мутланеныт.
Вет шочмо кундем деч ӧрдыжтӧ илыше калыклан чыла тидыжым арален кодаш куштылгыжак огыл. Поснак самырык-влак монден толыт. Кеч азербайджан-влакын ойлымышт почеш, нунылан Марий кундемыште илаш ласка. Шукынжо шкеныштым тӱрло сферыште муыныт, вуйлатышат лийыныт. Азербайждан-влакын кок мер организацийжат республикысе мер илышыште чолгалыкым ончыкта. Тидым Марий Элын тӱвыра, печать да калык-влакын пашашт шотышто министрын алмаштышыже Михаил Матевеев поснак палемден кодыш. Пример шотеш «Марий Элыште азербайджан-влак» организаций пелен кугурак-влакын советыштым вуйлатыше Таджаддин Касумовымак налаш. Тудо тыште ынде 58 ий ила, Марий Элым шочмо верлан шотла.
«Йыргешке ӱстелыш» Тӱвыра, печать да калык-влакын пашашт шотышто министерствын этноконфессиональный кыл да массовый коммуникаций шотышто пӧлка вуйлатышын алмаштышыже Игорь Садовин, тыгак Российысе калык-влакын региональный ассамблейыштым вуйлатыше Дмитрий Григорьев, Баку гыч «Тездлар» азербайждан йылме дене лекше газетын пашаеҥже Эльчин Манаф Маммадов да молат толыныт ыле. Шочмо кундемышт гыч толшо еҥым поснак шокшын вашлийыныт.
«Йыргешке ӱстел» годым мер ушемын еҥже-влак шке пашаштым уемден колташ полшен кертше ятыр сай темлымашым колыныт. Мутлан, лишыл жапыште республикыште эртышашлык «Курымешлан Россий дене пырля» форумыш ушнаш лиеш. Лачшымак «Калык-влакын келшымаш парадыштыже» азербайджан калык муро ден куштымашым ончыкташ йӧн уло. Самырык азербайджан-влакым тыгаяк «йыргешке ӱстелыш» чумыраш, калыкын йӱла пайремже-шамычымат кугурак кӱкшытыштӧ эртараш шонат. Мутат уке, организацийын ик эн тӱҥ пашаже семын Марий Элыш илаш куснышо земляк-влаклан полышым пуымаш кодеш.
С.Носова.
