6 февральыште Марий Эл Кугыжаныш Погынын заседаний залыштыже регионын парламентшым вуйлатыше А.Смирнов республикысе тӱшка увер средствылам вуйлатыше-влак дене вашлийын.
Тыгодым Анатолий Васильевич Кугыжаныш Погынын шымше созывшын 2019 ий октябрь гыч 2020 ий февраль марте шуктымо пашажым иктешлен да ончыкылык программыж дене палдарен. Кугыжаныш Погын аппаратым вуйлатышын алмаштышыже, правовой виктем начальник Елена Попова парламентыште законодательный процессым организоватлыме нерген каласкален. Увер виктемын начальникше Геннадий Логинов парламент ден СМИ кокласе вашкыл нерген ойлен, нуным вуйлатыше-влакын йодышыштлан вашештен.
Тӱҥ ужаш деч вара Марий Эл Кугыжаныш Погынын председательже А.Смирнов «Марий Эл» газетын тӱҥ редакторжо А.Абдуловлан Кугыжаныш Погынын Чап грамотшым кучыктен. Тушто тыге возымо: «Марий Эл» газет редакцийын коллективше Марий Эл Республикысе национальный массовый информаций средство-влакым вияҥдымашке кугу надырым пыштымыжлан, Марий Эл Кугыжаныш Погын дене конструктивный вашкылым кучен шогымыжлан да газетым лукташ тӱҥалмылан 105 ий теммылан кӧра наградитлалтеш». Чап грамот пелен эше редакцийын эртарыме «105 ийлан – 105 книгам» акцийжылан вич чапле книгам кучыктен.
М.ИВАНОВА
