Марий Эл Республик вуйлатышын обязанностьшым жаплан шуктышо Александр Евстифеевын тыршымыжлан кӧра регионысо медицине тӧнеж-влак Россий Федераций Президентын резерв фондшо гыч 245 миллион теҥгем налыт. Тиде средстван утларак ужашыжым Козьмодемьянск олаште у поликлиникым чоҥаш ойыраш палемдыме.
Курыкмарий районысо Кулаковы селаште Красноволжский школым чоҥен пытарыме деч вара Медведево ПМК-н бригадыже-влак вигак Козьмодемьянск оласе поликлиникым чоҥаш куснат. Иктаж тылзе ончыч А.Евстифеев ты стройплощадкыште лийын, ынде у спортзал ден актовый залым чоҥымо пашам тергаш толын.
«Тунемме ий мучашлалтме марте улыжат икмыняр кече кодын, а терым кеҥежым ямдылаш кӱлеш. Тиде школым кундемысе калык чот вуча, молан манаш гын витлымше ийлаште чоҥымо ончычсо оралте аварий лӱдыкшан. А вет тыште мемнан йоча-влак шинчымашым погат, – палемден А.Евстифеев. – Олам чоҥымо политике нерген мут лектын гын, умылаш кӱлеш: тидым ала-могай ӧрыктарыше да сӧрал замок гыч огыл, а образованийлан, медицинылан, илышлан кӱлешан теве тыгай тӧнеж гыч тӱҥалман.
План почеш, туныктымо тӧнежын модернизацийже 1 сентябрьлан мучашлалтшаш, да у школ тунемше-влакым вашлиеш. А поликлиникын шокшо контуржым строитель-влак 1 ноябрь марте ыштен шукташ сӧрат.
Марий Эл Республик вуйлатышын обязанностьшым жаплан шуктышо А.Евстифеев Кулаковы селасе школын да Козьмодемьянск оласе поликлиникын чоҥалтмыштым шке контрольышкыжо налын.
М.ИВАНОВА.
