Марий Эл Республикын Тазалыкым аралыме министерствыже «Ялысе доктор» программым илышыш пуртымо кышкарыште Советский районысо рӱдӧ эмлымверыш пашам ышташ толшо акушер-гинеколог дене ик миллион теҥге кугыт компенсационный выплатым пуышашлан ойпидышым ыштен.
2017 ийыште ялысе эмлымверлаште ынде вич врач-миллионер пашам ышташ тӱҥалын. Тазалыкым аралыме министерствын пресс-службыжын данныйже почеш, ик миллион теҥгем эше Звенигово районысо Суслоҥгер врач амбулаторийын врач-терапевтше, Юрино районысо рӱдӧ эмлымверын врач-педиатрже, Шернур районысо рӱдӧ эмлымверын кардиологшо, Параньга районысо рӱдӧ эмлымверын хирургшо налыныт.
«Ялысе доктор» федеральный программын пашам ышташ тӱҥалмыж деч вара республикысе районлашке 68 специалист пашам ышташ каен. Нунын кокла гыч кажныже ик миллион теҥге кугыт компенсацийым налын: 60 процентшым – федеральный бюджет гыч, 40 процентшым – Марий Эл Республикын бюджетше гыч.
2018 ий гыч «Ялысе фельдшер» программым илышыш пурташ да, тудын дене келшышын, ялысе ФАП-ыш пашам ышташ толшо специалистлан 500 тӱжем теҥге кугыт единовременный пособийым тӱлаш палемдыме.
М.ИВАНОВА.
