Марий Элын Социальный вияҥмаш министерствыжын палемдымыж почеш, 2019 ийыште «Мобильный бригаде» службо республикысе медицине организацийлашке яллаште илыше 499 илалше еҥым конден да тазалыкым тергыме деч вара мӧҥгеш наҥгаен, тений 4 февраль марте – 81 гражданиным.
«Демографий» национальный проектын «Кугурак тукым» региональный проектшым илышыш пуртымо кышкарыште Марий Элыште илалше еҥ-влакым медицине организацийлашке кондыштараш 18 автомашинам налме да куснылшо бригаде-влакым лӱмынак чумырымо. Тиде кӱлешан пашам ӱмаште октябрь гыч шукташ тӱҥалме.
Палемдыме йӧн дене яллаште илыше 65 ий деч кугурак ийготан граждан-шамыч пайдаланен кертыт.
Лӱмын чумырымо куснылшо бригаде полшымо дене илалше еҥ-влак районысо ма рӱдоласе поликлиникылашке йӧнан автомашина дене чылт яра толыт да мӧҥгышкыштат оксам тӱлыде пӧртылыт. Кӧм да кунам кондыштарыме паша, медицине организаций-влакын пуымо спискышт дене келшышын, пеҥгыдемдыме график почеш шукталтеш.
М.ИВАНОВА
