«Марнетын шӱдыржӧ» конкурсын «Марий калыкын тӱвыражлан, искусствыжлан, йылмыжлан, историйжылан, религийжылан да йӱлажлан пӧлеклалтше эн сай тематический сайт» номинацийыште Звенигово районысо Кужмара села гыч Валентина Семёнован «Тылат кидем» сайтше сеҥышыш лектын.
Ты чолга ӱдыр ик жап «Марий Эл» газет редакцийыштынат верстальщик семын ыштыш. «Тылат кидем» сайтше икшыве-шамычлан, нунын творчествыштлан, йочасад, школ туныктышо, воспитатель-влаклан пӧлеклалтын. Кок ий наре жапыште тудым ончаш кумылан-влак ситышын погыненыт. Шке жапыштыже тудо Марий кугыжаныш университет деч вара Эстонийыш шинчымашыжым нӧлташ каен. Вара Таллиныште марий рушарня школышто туныктышо семын ышташ тӱҥалын. Икмыняр жап гыч Тартушто марий йылме кафем почын. Марий йылме дене мутланаш туныктымо виртуальный да реальный урок-влакым эртарен. Ончыч чумырымо материалжым тудо ВКонтакте соцкылысе шке лаштыкшыкыже поген. А вара шкенжын посна сайтшым почын. Кызыт тудым пойдарен толеш. Таче ӱдыр Йошкар-Олаште ила, тыгак репетитор семын ышта, кумылан-влакым марла, эстонла мутланаш туныкта.
С.НОСОВА
Авторын фотожо
