1 апрельыште Сеҥымашын XXX идалыкше лӱмеш тӱвыра полатыште «Воштылаш, товатат, сулык огыл!» мыскара кас эртен. Тений «Кугарня» газет редакций 25 гана мыскарам йӧратыше-влакым ик верыш чумырен.
Фестивальыште Морко, Волжский, Параньга, Оршанке, У Торъял районла гыч участник-влак мастарлыкым ончыктеныт. Молгунамсе семынак нуно илышыште вашлиялтше тӱрлӧ оҥай случай негызеш ямдылыме мыскара-влак дене палдареныт.
Морко районысо Арын Чодыраял гыч «Пулдырчо» ансамбльын участникше-шамыч Валентин Петров ден Елена Семёнова кажне ийын тӱрлӧ мыскарам ончыктат. Ты гана нуно 35 ий пырля илымыштлан ял воктенысе ер воктене романтике шӱлышан касым эртареныт. Оршанке районысо Кугунур ял гыч Елена Рыбакова ден Римма Кудрявцева «Детектор лжи» дене икте весыштым тергеныт гын, Параньга районысо Усола гыч Светлана Ларионова ден Нина Григорьева «Могай чер?» сценке дене калыкым воштылтеныт. Волжский район Пызьыркуп гыч шершот, сава, каструль комдыш, торешпила, тӱрлӧ пырчым темыман ате да молым шоктеныт. «Тыгеат семым лукташ лиеш улмаш, чылт музыкантла кертыт», — манме шоктен воктен шинчыше-влак деч. Изак-шоляк Никас ден Ильюша Игнашевмыт аваштын гармоньым шоктымыж почеш такмак-влакым мурымышт дене воштылтеныт. Икшыве-влакым изинекак сценылан шӱмаҥдыме, мураш кумылаҥдыме ик могыр гыч сай паша, но Виктор Комаровын «Ну мо вара» мурыжлан нуно эше кушкын шуын огытылла чучо. Ончыкыжым Игнашевмытым ийготыштлан келшыше муро дене сценыште уэш ужмо шуэш ыле. Туге-гынат йочасадыш коштшо икшыве-влакым жюри посна приз дене палемден.
М.Шкетан лӱмеш Марий национальный драме театрын артистше Марина Почтенева «Шкет ӱдырамаш», Марий самырык театрын артистше Михаил Александров «Оньыкува» монологышт дене калык ончыко лектыныт. Мом ойлаш, артист — тудо артистак: шомакыштат раш, яндарын шоктен, шкештымат сценыште уто койыш деч посна кученыт. Моло участник-влаклан нуно пример семын лийыныт, шонем. Нуным жюри кумшо вер дене палемден.
Кокымшо верыш Морко гыч Наталья Алексеева ден Лариса Семёнова «Ынде ман» сценкышт дене лектыныт. А икымше вер Волжский районысо «Чоткар тукым» ансамбльлан логалын. Ты коллектив «Марлан кайынем» сценке дене калыкым чотак воштылтен. Тудым «Морозко» йомак ден «Окса мешак» спектакль негызеш ямдыленыт. Артист-влак образыш пурен моштымышт дене ойыртемалтыныт, костюмыштат чапле лийын.
Тений фестивальыште мыскара такмакым гармонь почеш мурышо-влакат таҥасеныт. Параньга районысо Памашъял гыч Артур ден Максим Вараксинмыт, Звенигово районысо Поянсола гыч Валерий Платунов ден Игорь Петров, У Торъял районысо «Ший оҥгыр», Оршанке районысо «Ош куэ» ансамбль-влак мастарлыкым ончыктеныт. Пытартышыже икымше вер дене палемдалтын. Ты коллектив-влакын ӱдырамашышт оҥай такмакым йоҥгалтарымышт дене веле огыл, сценыш пӧръеҥ лийын лекмышт да пурак лекмеш тавымышт денат воштылтеныт.
Фестиваль пайрем шӱлыш дене эртен, но ончыкыжым участник-влак сценыш лекташ сайынрак ямдылалтыт, ойлышаш шомакыштым сайынрак тунемыт, сценыш пӧръеҥ-влакат шукынрак лектыт манын ӱшаныме шуэш.
А.Байкова
И.Речкинын фотожо.
