У Торъял поселкысо тӱвыра да каныме рӱдерыште «Марий ӱдыр» районысо конкурс эртен.
Тушко чылаже вич ӱдыр ушнен. Тиде – Тушнур гыч Елена Янаева, Часамласола гыч Ирина Мартынова, Тошто Торъял гыч Ирина Торощина, Кӱан Памаш гыч Мария Грезина, Крешын Руй гыч Вероника Чемекова.
Нуно вич номинацийыште мастарлыкышт ден уш-акылыштым ончыктеныт. Визитный картычке «Марий ӱдыр мый улам» маналтын. «Марий ӱдыр – ушан ӱдыр» номинацийыште шонен моштымым, «Марий ӱдыр – мотор ӱдыр» номинацийыште этномодым, «Пайрем чес» номинацийыште ямдылыме национальный кочкышым, «Марий ӱдыр – ший талант памаш» номинацийыште усталыкым ончыкташ кӱлын.
Чыла шотыштат эн усталан жюри Елена Янаевам шотлен да тудымак «Марий ӱдыр» лӱм дене палемден.
Л.КАМАЛЕТДИНОВА.