«Erasmus+» программе дене Марий кугыжаныш университетын ныл студентше Испанийыш пел ийлан тунемаш каен. Кузе нуно тушто илат? Вес элыште могай нелылык дене вашлиялтыныт? Тиде да моло йодышлан проектын ик участникше Алина Волкова вашмутым пуыш.
Алина Параньга район Кугу Пумарий селаште шочын. Вич ияшыж годым ешыж дене Марий Турек район Косолоп селаш илаш кусненыт. Верысе школышто тунемын. Ӱдыр спорт дене кылым кучен, волонтёр пашам шуктен, тӱрлӧ мероприятий да конференцийлаште вийжым терген. Кандашымше класс деч вара Йошкар-Оласе политехнический лицей-интернатыш тунемаш пурен. Кызыт Марий кугыжаныш университетыште шинчымашым пога.
— «Erasmus+» конкурсыш ушнаш йот йылмым палыман. Алина тугеже тый англичанла сайын кутырен моштет?
— Лицей деч ончыч ты йылмым йӧршын пален омыл. Таум Марина Витальевна Докучевалан ойлынем, лач тудо йылме деке шӱмаҥден. 11 класс деч вара Марий кугыжаныш университетыш тунемаш толынам. Калык кокласе вашкылым шымлем. Тыштыжат тӱҥ предмет – йот йылме. Тудын дене пырля политикым, дипломатийым, экономикым келгын шымлена.
— Конкурсыш йодмашым колтымо кечет кызыт омо гай веле чучеш, очыни. А жапыштыже пеш тургыжланаш таратен…
— Испанийыш корнем конкурс нерген увертарыме гыч тӱҥалын. Йодмашым колташ лач кок кече кодын ыле. Чыла англичан йылме дене возыман. Пиалашем йолташ-влак воктене лийыныт — полшеныт. Писын ышташ логалын. 17 октябрьыште электрон почтышкем вашмут толын: грантым сеҥыше кокла гыч иктыже мый улам. Пел ийлан йӧратыме элышкем тунемаш каем – могай пиал! Но тиде але тӱҥалтыш гына лийын. Кодшо кок тылзе шуко документым погаш логалын. Визым ышташ, илаш верым ончылгоч кычалаш, билетым налаш кӱлын.
«Erasmus+» программыш очно тунемше студент-влак ушнен кертыт. Тыгак университет коклаште тунемме специальность икгай лийшаш. Те студент огыдал, заочно тунемыда але кӱшыл шинчымашым огыда нал гынат, шуко вес программе улыт. Шке вийдам терген ончаш ида лӱд.
— Испанийыште верысе калыкын могай койышышт поснак ойыртемалтеш?
— Нуно йӧршын вес тӱрлӧ улыт. Илышым пеш йӧратат. Тидыже мутланымышт гочат шижалтеш. Иктаж испанецым вашлийыда гын, тудо тыланда шыриялта.
Рушарня ты элыште еш кечылан шотлалтеш. Кевыт, сатулымо рӱдер, вес учреждений-влакат пашам огыт ыште. Еш-влак кафеште шинчат, пляжыште йоча дене пырля футбол але вес спорт модыш дене модыт. Сиеста нергенат ойлыде огеш лий. Тиде калыклан кечывал деч вара каналташ пуымо жап. Тунам поснак кафеште арака бокал да газет дене шинчыше-влак вашлиялтыт.
Ты элыште кажне еш могайгынат спорт дене кылым куча, сурт янлыкше уло. Утларакшым пийым йӧратат.
Йолын коштшо-влак ПДД правилым огыт эскере, тидыже пеш ӧрыктара. Еҥ-влак корным полиций ончылнат ок лий верыште вончен кертыт.
Оҥай случай-влакымат ужаш пернен. Мутлан, кевытыште ужалыше тендан деке толын, перчаткымат чияш полшен кертеш.
Кызыт ме кажне кастене уремыш лекташ тыршена. Коча-кован ваш кид кучен кайымышт поскак куандара. Тыште икшыве-шамычым шочмо кече дене оҥайын саламлат: йоча илыме сурт деке полиций машина-влак кудал толыт да «Happy birthday» мурым колтат, вара громкоговорительыш поро мутым ойлат.
Карантин годым кажне кечын еҥ-влак балконыш лектын медицине пашаеҥ-влакым кидсовыш дене вашлийыт. Меят тиде мероприятийыш уло кумылын ушненна.
Университет нерген ойлаш гын, Европысо тунемме системе йӧршын весе. Кажне студент кӱлеш предметым шкаланже шкак ойыра. Корпуслаште библиотеке уло. Тушто компьютерым кучылташ да кӱлеш книга дене пайдаланаш лиеш.
А те паледа: Испанийыште студент-влак канаш изарнян погынат. Мемнан дене тунемше-влак кугарням вучат.
— Корныштыда нелылык лектын?
— Испанец-влак англичан йылмым огыт пале. Кызыт южо испан мутым тунем шуктенам, изиш мутланен кертам. Тыгак тыште суртым огыт ырыкте, садлан телым йӱштӧ да вӱдыжгӧ. Ырыктыше коҥга уло, но вара электроэнергийлан шуко тӱлыман. Тыгак банк карте дене умылыдымаш лектын. Карантин деч ончыч тудлан йодмашым ыштыме, банк пашаеҥ-влак ме Российыш пӧртылмӧ манын шонен, мыланна тудым Йошкар-Олаш колтеныт.
— Яра жапым кузе эртарет?
— Карантин деч ончыч университет пеленысе тренажёр залыш коштынам, волейбол дене модынам. Шуко жапым йолташем-влак дене эртарем. Пӱртӱсыш лектам, верысе тӱвырам шымлем. Тыгак чӱчкыдын «Erasmus+» программе денак тунемаш толшо вес элласе ӱдыр-рвезе-влак дене пляжыш карт дене модаш погынена.
Карантинлан кӧра мӧҥгыштӧ ятыр шинчаш пернен. Тидын годым МарГУ-штына да Кантабрийысе университетыште тунемынам. Неле ыле. Уремыш лач сатулан гына луктыныт.
Кызыт кечым кушталме гыч тӱҥалам. Шуко лудам. Фото, видео-влакым ыштем. Шокшемда, самоизоляций режим куштылемеш, сандене южгунам пляжыш миен толам. Испанийысе вузышто кызыт лач экзамен жап, тудлан ямдылалтам.
— Тау, Алина. Ончыкылык корнет волгыдо лийже.
— Тау!
О.МОШКИНА
