Йоча-влаклан эртаралтше да театрлан пӧлеклалтше Россий кӱкшытан кок конкурсын регионысо этапшым кодшо кечылаште Йошкар-Олаште иктешленыт, увертара Республикын тӱвыра, печать да калык-влакын пашашт шотышто министерствыжын пресс-службыжо.
Конкурсыш ушнышо-влак палемдыме теме почеш сӱретым ямдыленыт, рецензийым возеныт. Нунын пашаштым 19 апрель гыч 18 август марте онченыт да эн сайыштым ойырен налыныт.
Морко йоча искусство школын тунемшыже Элина Абросимован сӱретше эн мотор лийын. Тудо «Щелкунчик» балет гыч ужашым сӱретлен.
А «Театр нерген возена» конкурсышто Йошкар-Оласе 9-ше №-ан школын тунемшыже Диана Гельванова сеҥышыш лектын. Тудо конкурсыш Киров кугыжаныш самырык театрын шындыме «Мюнхгаузен» спектакльжылан рецензийым возен.
Тугеже нине ӱдыр-влак 23 сентябрь гыч 14 октябрь марте «Артек» тӱнямбалсе йоча лагерьыште канаш тӱҥалыт. Вет усталык конкурсын тӱҥ призше лач тыгай лийын.
А.БАЙКОВА
