«МАРИЙ ЭЛ» ТАЧЕ

«Марий Эл»: 2017 ий 7 октябрь

! «Вучен ноен, ӱшан  ден илат» вуймутан  статьяште  Шернур район Чылдемыр ял илемыш пурышо Нольыкмарий, Пӱнчерйымал, Тумерсола да Нурсола яллаш пурышо  корным ыштыме нерген ойлалтеш.  Корнылаш тыгыде кӱм шарымым ончен, верысе калыкын кумылжо мыняр-гынат нӧлталтын. Шукеш огыл, тыште шошо ночкышто да йӱр деч вара кудал эрташ лийдыме ончычсо тазылаҥше шунан корно шарнымашешышт гына кодеш. «Старосто семын мый ты корным ыштыкташ 17 ий толашен коштынам, республикыште кушко гына миен омыл. Москвашкат шуынам», — манеш Пӱнчерйымал ялын старостыжо В.Березин. 

!  Тений 14 октябрьыште Кужэҥер район Аҥанур ялыште ты кундемын шочшыжо, мер пашаеҥ, шанчызе, литератор, туныктышо, марий-влакын ончылъеҥже Иван Ефимович Романов-Одарын шочмыжлан 130 ий теммым палемдаш тӱҥалыт да ялыште шарнымашан палым пышташ шонат. «Таргылтыш» дене веле огыл чапланен» вуймутан статьяштыже Светлана Носова ты айдеме нерген кумдан каласкала.

! «Кукнур волостьын кубокшо верч» вуймутан статья 30 сентябрьыште Шернур районышто «Кукнур пайрем» эртыме дене палдара. «Шыже пазарыш» лишыл ялла гыч лӱмынак шуко тӱрлӧ костенчам кондат. «Модмо вер» кумылан еҥ-влакым тӱрлӧ конкурсыш, модмашке ушен. «Кундемнан мастар коваже» конкурсышко вич ял гыч ковай-влак ушненыт. «Мый да Кукнур кундем», «Кызытсе ковай могай лийшаш» номинацийлаште, когыльым кӱэштын конден, рецептше дене  палдареныт.

! 27-30 сентябрьыште Сыктывкарыште (Коми Республик) Россий Федерацийысе финн-угор калык-влакын (РФ АФУН) погынышт эртен.

Марий Эл гыч мийыше делегацийыште шымлызе, краевед, туныктышо, журналист, кугыжаныш да мер пашаеҥ, культурышто тыршыше, адвокат, пашадыме… Икманаш, марий мер пашам, тыгак финн-угор калык-влакын культурыштым, йылмыштым, йӱлаштым аралыме да вияҥдыме корным тӱрлӧ шӧрын гыч аклаш, вес шинчаончалтыш дене ужаш йӧн лийын. Тидын нерген  РФ АФУН-ын марий пӧлкажым вуйлатыше Светлана Пехметова воза.

! Газетын спорт обозревательже Елена Эшкинина «Ончыкылык тукымын тазалыкше эн шерге» вуймутан  кумдаҥдыме уверыштыже 4-24 сентябрьыште Анапыште эртыше Президент состязаний эртыме дене палдара. Марий Элын чапшым Волжский район Сотнур кыдалаш школ ден Волжскысо 9-ше №-ан школ гыч тунемше-влакын командышт араленыт. Нуно 20 эн тале команде коклаш логалыныт. Финал этап «Смена» всероссийский йоча рӱдерыште эртен. Ӱдыр-рвезе-влаклан (кандашымше классыште тунемше 4 ӱдыр да 4 рвезе миеныт) чылажат чот келшен. Поснак – финал таҥасымашым торжественно почмаш.

А.АНДРЕЕВ  ямдылен.

Опубликовать в Одноклассники

Добавить комментарий