Марий Эл Республик вуйлатышын стипендийжым пуымо эксперт советшын заседанийыштыже 2018-2019 ийласе стипендиат-влакын спискыштым пеҥгыдемденыт. Оксам 59 еҥлан пуаш палемдыме. Тушеч 28 еҥ – ссузлаште тунемше (1600 теҥге), 22 еҥ – вузласе студент-влак (2400 теҥге) , 9 еҥ – аспирант-шамыч (3000 теҥге).
Марий Эл вуйлатышын стипендийжым тунеммаште, шанче пашаште сай шинчымашым ончыктышо ӱдыр-рвезе-влаклан кучыктат. Ссузласе студент тиде стипендийым налаш манын, «визытан» отметкылан (50 процент деч шагал огыл) тунемшаш, тыгак эртыше тунемме ийыште тӱрлӧ конкурсышто, олимпиадыште сеҥыше але призёр лийшаш.
Вузышто тунемше, аспирант-шамыч шанче статьям возышаш, иктаж авторский открытийым ыштышаш, тунемме верын эксперимент пашашкыже ушнышаш.
Л.Шабдарова
