СЫЛНЫМУТ ШКОЛ ЙОЛГОРНО

«Марий Эл» пеленемак ила

«Марий коммуна» гыч тӱҥалын,

Мый нылле вич ий кидышкем

Кучем газетым, чот вучалын,

Вашке, вашке пеш шергалнем!

 

Шарнем: ачам, пуртен газетым,

Мемнам шке йырже чумырен,

Ӱстел воктене кугу ешым,

Чон почын, тудым лудыктен.

 

Тыге ме кушкынна, паленна,

Кузе илен Марий кундем,

Ава гай ныжыл шочмо йылме

Латкум йочам сымыстарен.

 

Да кызытат мый «Марий Элым»

Чон куан ден кучен лудам.

Рончен уверым, илыш семым,

Йоча-влак ончык лукталам.

 

Шергалын кажне лаштыклажым,

Мый илыш лоҥыш пуралам

Да шочмо йылмын ямле вийжым

Ты газет мучко раш ужам.

 

«Марий Эл» дене родо лийын,

Лиеш осал деч кораҥаш.

А озавате сай лийнет гын,

Пеш шуко уло ой-каҥаш.

 

Но тӱҥжӧ: шочмо кундеметын

Лай илыш семже ден(е) илет,

Ава чон гай марий йылметын

Поян саскаже – ончылнет.

 

Ӱжам мый кажне марий ешым:

Йӧратеда гын калыкнам,

Те налза, лудса «Марий Элым»,

Тунам чонда лиеш поян.

З.Беляева (снимкыште), Советский район Кодам тӱҥ

школышто марий йылмым туныктышо, Марий Элын сулло да Калык туныктышыжо.

М.Скобелевын фотожо

Опубликовать в Одноклассники

Добавить комментарий