Турстат портал шыжым санаторно-курортный канышлан йӧным ыштыше регион-влакын рейтингыштым ыштен. Марий Эл тушто 20 эн ойыртемалтше регион-влак радамыш логалын.
Каласен кодыман, ты рейтингыш Российын кечывалвелысе курортшо-влак пурталтын огытыл. Тидын годым моло регион дене танастарымаште Марий Элыште шыжым канаш шонышо-влак тидым шулдынрак ыштен кертыт. Шымлымаш ончыктен: кокла шот дене налаш гын, марий санаторийлаште каныме ак суткалан 1850 теҥгеш шуэш, Чувашийыште изиш шергырак — 2080 теҥге, Татарастаныште — 2120 теҥге. А теве тений шыжым Москва воктенысе санаторийлаште эмлалт канымылан суткаште 2950 теҥгем тӱлыман.
С.НОСОВА
