Агробизнес кадрым уэш ямдылыше марий институтышто «Мӱкш ончымо пашам жаплан келшыше йӧн дене виктарен колтымаш» теме дене регион кокласе научно-практический да отчет конференций эртен.
Республикысе мӱкшызӧ-влак тыгай конференцийыш талукышто кок гана – шыжым да шошым – погынат. Тылеч посна икмыняр семинарыште шинчымашыштым нӧлтат, опытым шымлаш пошкудо регионлашке, шкенан кундемысе отарлашке миен коштыт. Ты гана конференцийыш Киров, Нижегородсий областьла, Татарстан Республик гыч уна-влак толыныт ыле.
Тиде палдырныш: тыгай мероприятийыш ты гана районла гыч мӱкшызӧ-шамыч шагалынрак толыныт. Тидым пытартыш кок-кум ийыште мӱй лектыш начар лийме денат кылдышт. Республикысе «Марий отар» ушемышкат ешаралтше-влак лийын огытыл. Кызыт кундемысе чумыр мӱкшызӧ гыч улыжат 7 процентше ушем членлан шотлалтеш. Мӱкш еш шагалемын. Адакшым ынде «Меркурий» системыште электрон регистрацийым эртыде, мӱкш сатум ужалаш чаралтеш. Погынымаште ятыр моло проблемымат каҥашыме. Кумданракше газетын лишыл номерыштыже лудын кертыда.
В.Смоленцев.
