1 июль гыч Марий Элыште коммунал услугылан тариф кокла шот дене 3,5 процентлан кӱзен.
Тыге, оласе калыклан электроэнергий 3,49 гыч 3,66 теҥге марте шергештын, ялысе да олаште электроплита дене пайдаланыше-влаклан – 2,44 гыч 2,56 теҥге марте.
«Водоканал» МУП рӱдоласе клиентше-влаклан вӱдын акшым 16,4 гыч 17,05 теҥге (НДС дене пырля) марте кӱзыктен. Волжск олаште илыше-влакын йӱшаш вӱдышт 70 ырлан шергырак лийын, тушто тариф 18,38 гыч 19,08 теҥге марте кӱзен. Козьмодемьянскыште йӱшаш 1 кубометр вӱд 36,36 гыч 37,72 теҥге лийын. «Медведево водоканал» МУП-ат вӱдын акшым 21,69 гыч 22,64 теҥге (НДС дене пырля) марте нӧлталын.
Илыме верым ырыктыме услугат шергештын. Мутлан, Йошкар-Оласе ТЭЦ-1 кажне гигакалорийлан 1820,06 олмеш 1880,53 теҥгем (НДС дене пырля) налеш.
Республикысе муниципальный образований-влакын тарифышт шотышто тичмаш уверым Марий Эл правительствын официальный интернет-порталжын «Государственное регулирование тарифов» лаштыкыштыже муаш лиеш.
Ушештарена, Федеральный антимонопольный службо июльышто илыме-коммунал услугылан тарифым кӱзыктымӧ шотышто нимогай ситыдымашым муын огыл.
М.ИВАНОВА.
