Марий Элыште тений але марте ава капиталым 182 еш икшывым туныктышашлан ойырен.
Тиде кугыт 4,2 млн. теҥгешке шуын. Тышеч 49 еш ӱдыр-эргыжым вузлаште да техникумлаште туныкташ кучылтын.
Кокымшо але утларак йочан шочмекше, тудлан 3 ий темме деч вара ава капитал дене кеч-кудо икшывым туныкташат пайдаланаш лиеш. А теве дошкольный образованийлан тиде оксам кокымшо йоча шочмеке вигак кучылт кертыт.
Ава капитал оксам тӱрлӧ йӧн дене туныктымылан веле огыл, тыгак туныктымо организацийын шинчымашым пуымо жаплан ойырымо тӱшкагудыштыжо илымыланат тӱлаш лиеш, палдара ПФР-ын Марий Элысе отделенийже.
Ава (еш) капиталым кучылтшаш нерген йодмашым ПФР-ын территориальный органышкыже илыме вер шот дене але «Личный кабинет гражданина» гоч электрон йӧн дене пуаш лиеш.
Л.Камалетдинова.
