Марий Эл вуйлатыше Александр Евстифеев 16 ноябрьыште Килемар районышто лийше шучко корно азапыште чот эмганыше-влакын тазалыкышт шотышто йодышым контрольышто куча.
Марий Элын Тазалыкым аралыме министерствыжын палемдымыж почеш, эмганыше да кызыт эмлымверыште кийыше чыла ныл еҥын состоянийышт пеҥгыде, тазалыкышт саемаш тӱҥалын.
Врач-влак ӱдырамашын тазалыкше шотышто лӱдмым чарненыт, 22 ноябрьыште тудым реанимаций гыч палатыш кусареныт. Шым ияш рвезе Республикысе йоча клинический эмлымверын реанимацийыштыже кия, тудын тазалыкшым врач-влак чарныде эскерат. Кодшо кугарнян МЧС-ын бортшо дене Казаньыш наҥгайыме 14 ияш ӱдыр – реанимацийыште. Тудын состоянийжымат врач-шамыч пеҥгыде семын палемдат. Йошкар-Оласе эмлымверыш кондымо 17 ияш рвезым реанимаций гыч палатыш кусарыме.
Кызыт Йошкар-Оласе медицине тӧнежлаште пневмоний деч профилактике эрта. Тидын шумлык корно азапыш логалше-влаклан антибиотик терапий да эмлыше физкультур эртаралтеш.
М.ИВАНОВА.
