27 июльышто Марий Эл гыч (Волжск ола) Артём Коровин вӱдым куэн кайыме дене (байдарке, каноэ) тӱнямбал первенствыште юноши-влак коклаште 1000 метр кужытышто шкет таҥасымаште индешымше верым налын. Сеҥыше деч 14,5 секундлан почеш кодын.
28 июльышто Артём элнан сборныйыштыжо Данил Ветров, Дмитрий Иваник, Дмитрий Моргунов дене пырля таҥасен, 500 метр кужытышто вийжым терген, брозо призёр лийын. Ушештараш уто огыл: тылзе наре ончыч нылытынак Европын первенствыштыже ший призёр лийыныт.
Тренерже Е.Мещеряковын палемдымыж почеш, рвезе ончыкылан ӱшаным пуа. «Сандене лишыл жапыште эшеат кугу кӱкшытан таҥасымаште кугурак-влак коклаштат вийжым тергаш тӱҥалеш. Можыч, 2020 ийыште эртышаш Олимпийский модмашкат кандидат семын лиеш», – палемден ыле ик интервьюштыжо. Тыгак. Артём тӱнямбал кӱкшытан таҥасымаштат ик гана веле огыл вийжым терген.
Е.Эшкинина
