Марий Элысе рвезе-влак «Гвардеец-1» юнармий оборонно-спортивный лагерьыште кумшо верым налыныт.
29 июньышто Нижегородский областьысе Кстово олаште ПФО-н «Гвардеец» оборонно-спортивный тазаҥдыме лагерьыште икымше смене мучашлалтын.
Участник-шамычым Россий президентын ПФО-со полномочный представительжын полышкалышыже В.Колчин саламлен.
«Гвардеец» – шкешотан, ойыртемалтше военно-патриотический проект. Тудлан тўҥалтышым Россий президентын ПФО-со полномочный представительже М.Бабич ыштен. Проектым илышыш шыҥдараш Обороно министерстве ден ДОСААФ полшат. Ик смене иканаште кок регионышто («Гвардеец-1» (Кстово) да «Гвардеец-2» (Пенза)) 18 кече шуйнен. Ты гана 8-9 класслаште тунемше 360 еҥ спорт да военный ямдылалтмашым эртен.
Марий Эл гыч 19 йоча (Советский, Медведево районла да Волжск, Йошкар-Ола) логалын.
Тӱҥ шотышто кадет, патриотический клуб-влакын воспитанникышт, воинский долгым шуктымаште вуйым пыштыше МВД пашаеҥ ден офицер-влакын икшывышт, тыгак шуко икшыван ешыште кушшо йоча-шамыч лийыныт гын, тений чылан, манаш лиеш, шуко икшыван, тӱнен илыше да неле илыш ситуацийыш логалше-влак, «Юнармий» всероссийский йоча-юношеский военно-патриотический движенийын представительышт лийыныт.
– Рвезе-влак, общевойсковой курсым эртенда, физически ямдылалтында, Россий армийын илышыж дене палыме лийында. Тидыже ончыкылык илышыште профессийым ойырен налме шотыштат сай йєн лиеш. Налме опытда элнан чын да ўшанле эргыже лияш полша, – ойлен В.Колчин.
Лагерьын икымше сменыжым петырыме годым рвезе-влак уна-шамычлан рукопашный кучедалмашын элементшым, флаг дене вокально-хореографический композицийым ончыктеныт, юнармейский военизироватлыме эстафетыште мастарлыкышт дене ойыртемалтыныт.
Опытан офицер-шамычын вуйлатымышт почеш рвезе-влак салтак илышлан, армий радамыш шогалаш ямдылалтыныт. Тыгак командын икоян улмыжым пеҥгыдемдашат тунемыныт. Самырык гвардеец-шамыч Российын историйже дене палыме лийыныт, военный дисциплинылан, ориентированийлан, топографийлан, строевой, огневой подготовкылан тунемыныт, тӱрлӧ таҥасымаште вийыштым тергеныт, полевой выходыш лектыныт, военный у технике дене палыме лийыныт.
Палемдыме программым эртыше рвезе-влак «Юнармий» радамыш пуреныт. Тылеч посна нунылан лагерьыште лийме жапыште шуко оҥай культур программе, экскурсий, шинчымашым пойдарыше мероприятий-шамычат келыштаралтыныт.
Иктешлыме семын, лагерьын икымше сменыж деч вара сеҥыше ден призёр-влакым палемденыт. «Гвардеец-1» лагерьыште Марий Элын сборныйжо кумшо верым сеҥен налын. Кокымышо верыш Удмуртий гыч команде лектын гын, икымшыш – Пермь край гыч гвардеец-влак.
Кокымшо смене 3-19 июльышто 10-11 класслаште тунемше-влаклан эрта.
2 июльышто Марий Эл гыч лагерьын кокымшо сменышкыже 18 рвезе каен. Тӱҥ налмаште Звенигово, Волжский, Советский, Оршанке районла, Козьмодемьянск, Волжск, Йошкар-Ола гыч улыт. 2013 ий гыч «Гвардеец» лагерьыште 4,5 тўжем утла рвезе лийын.
Е.Эшкинина.
