Марий Эл Республикын экологий паспортшо ышталтын.
Тудым Марий Элын Экологий лӱдыкшыдымылык, пӱртӱс дене пайдаланыме да калыкым аралыме шотышто департаментшын специалистше-влак ямдыленыт. Мом вара тушко пуртымо? Экологий паспорт гыч кундемнан географий шот гыч ончымаште кушто верланымыжым, климатшым, геологийжым, тыгак минерально-сырьевой базыже, мланде, вӱд, кушкыл ден янлык поянлыкше могай улымым пален налына. Кундемыштына мыняр посна аралыме кумдык, йырым-йырысе средам амыртыше источник улмо, атмосферысе южым лавыртыме, производство деч кодшо шӱкшак дене кузе пайдаланыме рашемеш. Тушто тыгак йырым-йырысе средам да посна компонетше-влакым аралыме дене кылдалтше могай пашам эртарыме нергенат ойлалтеш.
Экологий паспортыш пуртымо чыла сведенийым йырым-йырысе средам аралыме шотышто верысе кучемын, тыгак исполнительный властьын федеральный ден региональный органже-влак чумыреныт. Ты пашам нуно пытартыш вич ийыште эртареныт. Экологий паспортым научный пашам возымо годым кучылташ лиеш. Тыгак экологий шотышто могай вашталтыш лиймым, кушко шуын кертымым вигак шижаш йӧнан, увертарат ведомствын пресс- службыштыжо.
С.НОСОВА.
