Россий Федераций Советыште 10-11 декабрьыште эртышашлык Марий Эл Республикын кечыже-влаклан ямдылалтме паша вийым налын.
Тидын шотышто республикын правительстве пӧртыштыжо пашаче совещаний эртен. Тудым регион вуйлатыше Александр Евстифеев эртарен. Тудо эше ик гана палемден: ты кугу мероприятийлан сайын ямдылалтман, молан манаш гын республик шкенжын пеш кӱлешан йодышыжо-влакым решатлаш манын, Россий кӱкшытысо законодательный орган деч полышым налын, инвестиций дене кылдалтше проект-влак шотыштат мутым луктын кертеш. Сандене пашаче группо ден Москваш кайыше делегацийын ик эн тӱҥ задачышт — федеральный органын профильный комитетлаштыже регионын промышленностьышто, ял озанлыкыште, туризмыште, верысе кучемыште, IT-технологийым кучылтмаште, социальный да моло сферыште сеҥымашыже дене кӱлеш семын палдараш.
— Кажне министр ончылгоч шкенжым тургыжландарыше могай йодышым тушто нӧлталме нерген ончылгоч шонышаш, — палемден Александр Евстифеев. Тыгак ончылгоч шарышашлык материалымат, национальный ойыртемым ончыктышо стендымат, художественный номер-влакымат ончылгоч ойырен ямдылаш кӱлмӧ нерген шижтарен.
Марий Эл Республик вуйлатышын организаций да аналитике виктемжын уверже негызеш С.Носова ямдылен.
