Марий Эл вуйлатыше Александр Евстифеев теҥгече Килемар районыш паша визит дене миен.
Муниципал образований вуйлатыше Людмила Толмачева дене мутланымыж годым тудо вӱдыштӧ лӱдыкшыдымылык йодышлан эн кугу тӱткышым ойырен, палдара Марий Эл Республик вуйлатышын организаций-аналитике виктемже.
Килемар район – ерлан поян кундем. Людмила Толмачеван мутшо почеш, йӱштылаш келыштарыме вер кажне ял шотан илемыште уло. Еҥ-влакын канышышт илышыштлан лӱдыкшыдымӧ лийже манын, ер ден эҥерла деке рейд, калык дене мутланымаш эртаралтыт. Специалист-влак поснак кугу тӱткышым йоча-влаклан ойырат.
Александр Евстифеев Молевое ер воктенсе пляжым ончен савырнен. Кызытсе жаплан районышто лач тудо гына официальный пляжлан шотлалтеш.
Тыгак республик вуйлатыше сер мучко эртен да икмыняр экшыкым палемден.
— Тыште шудын моткочак сайын кушмыжым ужам. Йоча-влаклан ласкан каналташышт ты пляжыште вер уке, — каласен Александр Евстифеев.
Марий Эл вуйлатыше район вуйлатышылан ты кумдыкым шотыш кондаш, еҥ-влаклан канашышт йӧнаным ышташ ик арня жапым пуэн.
Л. Камалетдинова
