Тиде фотом 1988 ий кеҥежым ыштыме. Морко районысо Эҥерсола, тунам эше калык лӱмым нумалше «Мурсем» ансамбль, ты кеҥежым Москосо Калык озанлыкын шумо кӱкшытышым ончыктышо выставкыш, ВДНХ-ш, миен улмаш. Ансамбль тунам шке мастарлыкше дене чапланен. Гастроль дене эсогыл тӱрлӧ йот элыш миен коштын. Тудым Петр Павлович Эчейкин вуйлатен (снимкыште: ӱлыл радамыште шола гыч икымше). Тудо шкежак шӱвырым, тӱмырым, эсогыл кӱслем ыштен. Ансамбльыштыжат чыла нине семӱзгар дене шоктеныт. Таклан огыл варажым Петр Павловичлан «Марий Эл тӱвыран сулло пашаеҥже» чап лӱмым пуэныт.
А Морко партий райкомын идеологий пӧлкажым вуйлатыше Татьяна Степанова (снимкыште: кӱшыл радамыште пурла гыч икымше) тунам районышто тӱвыра йодышым курироватлен. Сандене тудат ансамбль дене пырля Москваш выступатлаш миен. «Тушто кок мужыр йыдалым куштен пытаренам, мучашлан эсогыл пундашкыже картон кагазым пышташ логалын», — шарналта эртыше жап нерген Татьяна Николаевна. Тудо кызыт республикысе Калык усталык рӱдерын тӱҥ администраторжылан ышта.
«Мурсем» калык ансамбль шке мастарлыкшым тунам ВДНХ-аште, Измайлов паркыште, Кремльысе Колонный залыште ончыктен. Татьяна Николаевна шарнымашыж почеш выставкыш мийыше-влаклан Морко марий ӱдырамаш-влакын оҥыш сакыме сылнештарышыже моткоч келшен. Вет тыгай сакышыже тошто ший окса гыч ышталтын. Окса коклаште чот ӧрыктарышыжат вашлиялтыныт. Сандене коллекционер-влак, тыгай оксам ужын, эсогыл ансамбль почеш коштыныт.Очыни, оксам кучен ончаш веле огыл. Тидлан кӧра марий самодеятельный артист-влак ласкан маленат кертын огытыл…
«Мурсем» ансамбль тачат уло. Чаманен каласыман, калык лӱмым гына ок нумал.
С.Носова.
Татьяна Степанован архивше гыч.
