Тачысе лаштыкын унаже – Шернур район Изи Чашкаялыште шочын кушшо Екатерина Мамаева. Уста марий ӱдыр Шернурысо Н.А.Заболоцкий лӱмеш 2-шо №-ан школышто шинчымашым поген. Индешымше класс деч вара Йошкар-Оласе Технологический колледжыш ургызылан тунемаш пурен. Кодшо ийын дипломым арален. Ик жап профессий почеш пашам ыштен ончен. Кызыт М.Шкетан лӱмеш Марий кугыжаныш драме театрыште тырша.
– Катя, ме тый денет марий самырык тукым слётышто палыме лийынна. Ты мероприятий могай кумылым коден?
– Слёт нерген 2018 ийыште пален налынам. Тунам вес ийын ушнемак манын шонен пыштенам, но йодмашым колташ вараш кодынам. Кодшо ийын пандемий тӱням авалтен, садлан адакат ты шонымашем шеҥгек шӱкалаш перныш. Тенийже, интернетыште уверым ужмеке, вигак йодмашым возенам. Участник радамыш логалмемлан моткоч йывыртенам.
Погынымаш мер пашашке ушнаш кумылым луктын. Ончычат тидым ыштынем ыле, но шке виемлан ӱшанен омыл. Ты темым палыше еҥ-влак дене вашлиймаш пайдале лийын.
Тыгак тушто проект возаш туныктеныт. Тидланже кажне кечын кок шагат ойыралтын. Слётын ик организаторжо, шуко проектын авторжо Маргарита Маланова «мозговой штурмым» манметым эртарен. Сергей Анисимов да моло кугурак опытан спикер-шамыч шке проектышт дене палдареныт, ой-каҥашым пуэныт. Ты шинчымашым ончыкыжым шке пашаштем кучылташ тӱҥалам.
«Марий йӱк» студийыште Андрей Чемышев сай качестван йӱкан видеом возаш туныктен. Кузе подкастым ышташ да тудым тӱрлӧ интернет платформыш вераҥдаш ончыктен. Йӱк дене пашам ышташ могай аппаратуро келшен толеш палдарен.
Мылам поснак кумшо кече келшен. Тунам слётчик-влак деке мастер класслам эртараш шагал огыл уна толын. Нуно шке шуктымо сомылышт нерген каласкаленыт. Мыйынат ушыштем икмыняр проект «шочо». Лишыл жапыште тудым илышыш шыҥдарем шонем.
– Слёт нерген социал сетьлаште палдарен шогенат ыле. Тыгак тый тушто марий калыкын илышыжым, йӱлажым чӱчкыдын ончыктет.
– Чынак. Пытартыш кок ий марий тӱвырам шке гыч шымлем. Колледжыште тунеммем годым мом ургаш манын, йодыш лектын ыле. Тыглай вургем кызыт пеш шуко. Тыге кажне кечын чийыме вургемыш марий ужашым пурташ шонен пыштенам. Тидланже калык тувырым шымлыман, тудын историйжым палыман. Садлан Ананий Иванов ден Сергей Свечниковын кок ужашан «История и культура народов Республики Марий Эл» книгштым налынам. Тушеч мый шуко уым пален налам. Тидым интернет йолташем-влак декат намиен шукташ тыршем.
– Ургаш кумылет кунам лектын?
– Ты сомыл мылам йоча годсек келша. Ончыч барби курчакемлан тувырым ямдыленам. Визымше классыште технологий урокышто кидпашалан туныкташ тӱҥалыныт. А мый ты жаплан шукыжым моштенам. Садлан эре ончылно лийынам. Икмыняр гана олимпиадышкат колтеныт. Индешымше классыште районышто сеҥышыш лекмемлан кӧра, республик кӱкшытыштӧ мастарлыкем ончыктенам. Тиде мылам кугу опыт лийын.
Колледжыште «Модный образ» конкурсышто кок гана вием тергенам. Тидланже лӱмынак кок марий тувырым ургенам. «Создание образа в этническом стиле» номинацийыште призовой верым налынам. Теният ты таҥасымашке ушнаш шонем.
–Тылеч посна тый сӧрастарыше ӱзгар-влакымат ямдылет. Тидын дене кумданрак палдаре?
– Марий калыкнан сылнештарыме ӱзгарже пеш сӧрал. Но тудым пайремлан веле чият. Вет нуно утыждене йылгыжыт да неле улыт. Мый кажне кечын пижыкташ йӧршым ыштынем. Тале кидмастар Евгения Кошкинан пашаже моткоч келша. Тудым ончен умбакыже тыршаш кумылаҥам.
– Школышто «Ший оҥгыр» куштышо ансамбльыш коштынат. Кызыт ты корнет умбакыже шует?
– Ончыч ӱдыр-рвезе-влак дене пырля ты коллективыш мураш да кушташ куаненак коштынам. Гастроль дене вес яллаштат лийынна. Йошкар-Олаш толмемлан кӧра тиде сомыл шеҥгелан кодын. Но ты опыт пеш кӱлешан лийын. Тудо, ончылно лияш манын шуко тыршаш туныктен.
– Тый тыгак Instagram-ыште ик марий маскын авторжо улат.
– Кодшо ийын мӧҥгыштӧ шуко шинчаш логалын. Лач ты жапыште фото гоч чурийым сылнештарыше маске-влак дене шукын пайдаланаш тӱҥалыныт. Нуныжо могай гына огытыл: янлык сӱретанат, йылгыжшат, фотом ошо-шемыш савырышат… А марий сынанже укеат манаш лиеш. Садлан ты пашам тӱҥальым. Ышташыже тӱрлӧ видео гоч тунемым.
Ямде лиймеке, ончыч йолташ ӱдырем-влаклан колтенам. Тыгай пашам шараш нелырак. Тудо посна калык дене кылдалтын, садлан марий деч молыжлан ок келше, шонем. Кумылда уло гын, тудым ужаш, йолташ радамыш ушныза да сторис манме окнаште ончалза. Instagram лӱмем тыгай: @itsmamyka.
– Тау. Тӱҥалме корнет сай лектышан лийже.
– Тау!
О.МОШКИНА
