Марий Тиште кечым палемдыме пайрем кышкарыште тений ынде шымше гана «Марла чын возена» диктантым тӱшкан возымо акций эртен.
Тудым эртарымашке Марий Элын Тӱвыра, савыктыш да калык паша шотышто, Образований да науко министерстве-влак ушненыт. Диктантым возымо тӱҥ площадкыже Марий кугыжаныш университетын Калыкле тӱвыра да тӱвыра кокласе коммуникаций институтыштыжо пашам ыштен. Но тыгаяк площадке-влак республикысе чыла районышто лийыныт. Тыгак диктантым возаш кумылым Удмуртийыште, Башкортостаныште, Татарстаныште, Ленинград областьыште, Таллин ден Тартушто, Хант-Манси автономный округышто илыше марий-влак ончыктеныт.
Университетын марий йылме да сылнымут кафедржын пашаеҥже-влакын палемдымышт почеш, акций годым мыняр площадке пашам ыштыме, мыняр еҥ диктантым возымо шотышто иктешлымаш Тиште кечым палемдыме годым лиеш. Кызытеш икте раш: тений возымо диктант Тӱп калык-влакын тӱнямбал йылме идалыкыштланат пӧлеклалтын да текстше М.Шкетан лӱмеш кугыжаныш драме театрын историйже дене кылдалтын. Амал деч посна огыл, вет тений театр курымаш лӱмгечыжым палемден.
Шкем марла возымаште терген ончаш кумылан-влак шукын лийыныт. Организатор-влакын палемдымышт почеш, кажне участник сертификатым налын кертеш. А сеҥыше-влакым диплом ден шарнымашан пӧлек вуча. Диктантым возышо икмыняр еҥын шонымашыж почеш, тений текст нелыжак лийын огыл.
С.НОСОВА
М.Скобелевын фотожо
