Кодшо кугарнян Йошкар-Оласе кӱртньыгорно вокзалыште, ӧрдыжъеҥлан Йошкар-Олаш толын шумеке, кушко кузе кайышашым ончыктышо да моло уверым пуышо кок турист объектым официально почыныт.
Тидым ышташ кӱлешлыкшат лийын, молан манаш гын марий рӱдола ий гыч ийыш турист-влакын кумылыштым налше олаш савырна. Сандене тыгай увертарыше указатель-влак кӱлытак. Тидымак шотыш налын, Йошкар-Оласе историй тоштер, Турист-увер рӱдер Йошкар-Ола администраций дене пырля Марий Элын Молодежный политике, спорт да туризм министерствыжын полшымыж дене турист-влаклан веле огыл, тыгак тыште илыше-шамычланат куштылгырак лийже манын, тыгай указатель ден увертарыше менге-влакым ынде кумшо ий вераҥдат. Тачысе кечылан лу тыгай обьектым почмо.
Кугарнян почмо кок объектше Марий Эл Республик вуйлатышын туризм областьыште грантлан конкурсыштыжо сеҥымылан кӧра ышталтыныт. «Турист сферыште эн ай рекламе-увер проект» номинацийыште ойыртемалтме тидлан полшен. Указательян меҥгыже кушко кузе кайышашым ончыкта гын, вокзал кӧргыш вераҥдыме объектыштыже олана нерген каласкалыше шуко брошюрым чумырымо, картымат муаш лиеш. Олаштына могай унагудо, кочмо, каныме вер улмым, кушто мом налаш лиймым пален налаш лиеш.
У турист обьект-влакым почмаште Марий Элын Молодежный политике, спорт дак туризм министрже Лидия Батюкова, Йошкар-Ола администрацийын Тӱвыра виктемжым вуйлатыше Владимир Хрулев лийыныт.
С.Носова.
Снимкылаште: турист-влаклан ынде куштылгырак лиеш.
Авторын фотожо.
