Марий Элын Тӱвыра, савыктыш да калык паша шотышто министерствыжын полшымыж дене республикысе Марий тӱвыра рўдер «Марий патыр» конкурсым икымше гана эртарен.
Тудын условийже почеш тушко 17-35 ияш рвезе, пӧръеҥ-влак ушнен кертыныт. Кандаш участник кокла гыч эн самырыкшылан чынжымак 17 ий лийын, эн кугуракшылан – 31 ий. Кажныже мотор да ойыртемалтше марий вургемым чиен.
Кузе вара марий патыр улмым пеҥгыдемдаш кўлын? Шке дене палдараш, калык йўла дене кылдалтше мӧҥгысӧ пашам, тыгак этнографий шинчымашым ончыкташ. Кажне гаяк участникын полышым пуышо тўшкаже лийын. Поснак визиткым, мӧҥгысӧ пашам ончыктымо годым рвезе-влак нунылан эҥертеныт. Мо оҥайже, армийыш ужатыме йўлам ныл рвезе ямдылен: Татарстанысе Озаҥ ола гыч Валентин Гайниев, Курыкмарий вел гыч Руслан Капитонов, Шернур посёлко гыч Дмитрий Веденькин, Звенигово район Юлъял гыч Анатолий Мартынов. Кажне композиций шкешотан ыле.
Озан гыч толшо рвезе нергенже поснак ойлыман. Тудо Пошкырт кундемысе Дєртыльє район Турбек ялыште тукым гыч тукымыш марий йўлам кучышо ешыште шочын-кушкын. Валентинат лач тыгай кумылан, марий улмыж дене кугешна. Шкеж дене палдарымыж годым тиде шижалте. Нефтекамскысе шуко профилян колледжым архитектур да градостроительство направлений дене тунем лекмеке, Озаҥ олаш илаш да пашам ышташ куснен, шкенжын лавкыжат уло. Чолгалыкше ты конкурсыштат икымше верым сеҥен налаш йєным ыштен.
Волжский район Пєтьял гыч Александр Гаврилов самырык-влакын кас шинчымаш йўлаштым ончыктыш. Тудо Озаҥыште пєртым чоҥышо комбинатыште пашам ышта. Спортлан, музыклан шўман, шкенжым марий эстраде аланыште терга, Чубайс семын палыме. Конкурсышто «Йула дене илыше» номинацийыште дипломым кучыктеныт.
Руслан Капитонов Чуваш кугыжаныш академический мурышо да куштышо ансамбльыште ышта, тыгак верысе «Шӹндыр» фольклор, Капитоновмыт еш ансамбль-влакын чолга участникше. Рвезе курыкмарла, татарла, чувашла, итальянла мура, тӱрлӧ конкурсышто шкенжым терга. Шочмо калыкшым, ешыжым, ача-аважым пагала. «Мунло да онарле» номнацийыште дипломант лие.
Дмитрий Веденькин Шернур посёлкысо 1-ше №-ан школышто тунемеш веле гынат, республикысе самырык-влак коклаште тудым палат. Почеламутым возышо, журналистикылан кумылан рвезе блогер, аниматор семынат шкенжым терга, интернетыште тӱрлӧ конкурсым эртара. Сценыштат шкенжым ӱшандарышын куча. Дмитрий интернет йўклымаште эн шуко йўкым поген да «Ончышо-влакын кумылыштым савырыше призым» сеҥен налме дене пырля кокымшо вер дене палемдалтын.
Волжский районысо Карай кундем гыч Сергей Савинов шке ялысе «Ший оҥгыр» ансамбль полшымо дене ӱдыр йӱктымӧ йўлам почын пуыш. Рвезе Волжскысо индустриально-технологический техникумышто тунемеш, мураш, кушташ йєрата, мурымат шкак воза. Гармонь дене пеш чолган шоктыш, такмак-влакымат йоҥгалтарыш. Жюри тудым кумшо вер дене палемдыш.
Морко район Унчо вел гыч Данил Иванов эше школышто тунемеш. Мураш, кушташ, кол кучаш йєрата, спортлан кумылан рвезе эше автомашинам коллекционироватла. Тудо у пєртлан негызым пыштыме да чоҥымо годсо йўлам тыгак шке кундемысе фольклор ансамбльын полшымыж дене ончыктыш Таклан огыл рвезылан «Вўмам кучышо» номинацийын дипломжым кучыктышт.
Эн самырык участник — Йошкар-Оласе 9 -ше №-ан школышто тунемше Максим Рябинин. Олаште шочын-кушшо рвезе марлат сайын мутлана, 6-шо №-ан йоча сымыктыш школышто хореографий дене шинчымашым налеш. Марий сӱаныште савушын куштымашыжым йолташыже-влак дене пырля туге ончыктыш, уло залым кожгатыш. «Чумбылатын вий-арже» номинацийыште диплом тудын лие.
Эн кугурак ийготанже Звенигово район гыч Анатолий Мартынов лийын. Чынжымак, «марий патыр» манаш лиеш. Илыш йогынышто чолгалыкшылан ӧраш гына кодеш. Тудо – районысо депутат-влак погынымашын, верысе Какшамарий ял шотан илемысе депутат-влак погынымашын депутатше, ялысе инициативный группын старостыжо, тыгак тӱвыра пєртым, тусо «Юл сем» фольклор ансамбльым вуйлата, черке хорышто мура. Шочмо кундемын историйжым, калык йўлам шымла. Лач ешым чумыраш гына эше жапым муын огыл. А йўкшӧ могай яндар, гармоньымат шокта. Чыла тидыжак тудлан «Марий патыр» конкурсын Гран-прижым сеҥен налаш полшен.
С.Носова
М.Скобелевын фотожо.
