КАЛЕНДАРЬ

Марий кумалтышын чинче тушыжо:

 «… Ош Кугу Юмо! Осал деч порым ойырен мошташ  яндар ушым пу, неле- йӧсым чыташ куатым ешаре.  Ушан еҥ денат кутыраш  ушым ешаре, чоя дене кутырашат шыма ойпидышым уштаре.  Кайыме-толмо корныштына ончыкыжымат вуй ӱмбал эҥгек дечат, йол йымал эҥгек дечат арален шогаш йодына. Шнуй виет дене полшыметлан, лишыл-мӱндыр корныштет арален кондыштарыметлан, вуй савалын, алал таум каласена да, Ош Кугу Юмо, лӱметым йӧратен, йывыртен чапландарена, кумал йодына, ӧрдыжеш ит кодо манын вуйнам савена. Юмо серлаге!»

Эрвел Семонын «О поро Юмо…» книгаж гыч налме (Йошкар-Ола, 2003 ий).

 Марий йӱла почеш:

 14 – Покро. Угинде пайрем.

Черке йӱла почеш:

 11 – Преподобный Кирилл ден Мария сиемонах-влакын, преподобный Сергий Радонежскийын ача-аважын, кечышт.

14 – Юмым Шочыктышо Эн Святой Аван Леведмыже лӱмеш пайрем. Кокшайск посёлкысо да Волжский районысо Усола, Шернур районысо Марисола, Оршанке районысо Упшо, Советский районысо Шнаран, Волжский районысо Купсола, Чодыраял черке-влакын престольный пайремышт.

Канон-влакым возышо да сылнын мурышо преподобный Романын кечыже.

17 – Озаҥысе архиепископ святитель Гурийын мощыжым мумо кече. Азъял-Пӧтъял черкын пайремже.

Шотыш налаш:

Вес тӱняш кайыше-влакым тӱшкан шарналтен уштымо черке йӱлам панихиде маныт.  Тидым мӧҥгыштат чесым поген ышташ лиеш. Ӱстелторыш шичме деч ончыч панихидын изирак чинжым эртарыман, 90-ше псаломым да «Отче наш» молитвам ончыч лудман. А кочкыш шотешыже  шыдаҥ пырче гыч шотлымо лачка пучымышым ямдылыман. Тушко мӱйым, пӱкшым да изюмым ешарыман.

Сай каҥаш:

Фэн-шуй – тиде китай калыкын мландын шолып вийже да тудын айдемылан тазалыкым, пиалым, поянлыкым конден кертме нерген шинчымаш.

Фен-шуй полшымо дене ешымат пенгыдемдаш лиеш. Еш кыдежыште пачерыште эрвелне верлана. Тӱҥ элемент тушто пушеҥге лийшаш. Тиде кушкылат, сӱретат лийын кертеш. Еш кыдежыште кӱртньӧ наста-шамычым кучылташ ок йӧрӧ. Кӱртньӧ пушеҥгым локтылеш. Тул тӱсан арверымат лучо кораҥдаш. Вес тӱняш кайыше-влакын фотосӱретыштымат тышан вераҥдаш ок темлалт.  Нунылан посна коробкам але альбомым ыштыман. Мом эше кораҥдыман: тендан еш дене кылдалтше огыл фотографий-влакым, кочывӱдым, шыже пейзаж сӱретым,  янлык чучылым, начарын огыл вияҥше кушкылым, кукшо пеледышым, теҥыз гыч кондымо тӱрлӧ ракушкым, кораллым. Тыгак пеш шуэн кучылталтше але шаланыше арверым кораҥдаш веле огыл, лучо сурт гычак луктын кудалташ темлалтеш.

Шарнаш кодшо ой:

Шулдыран кайыклан эрык шерге.

Шӱвалме шӱвылвӱдым мӧҥгеш нелаш огеш лий.

Шуко мурышо кукун вуйжа аҥырга.

Ӱмыр мучко логар ден ӱмбал кул лийын илет.

Тӱнян вуйжо – эрык илыш.

Шулдо каза кум йолан.

Окса шерге огыл, кумыл – шерге.

Мумо ӱзгарын ӱмыржо кӱчык.

А.Е.Китиковын «Марий калыкмут мутер» книгаж гыч налме.

С.Носова ямдылен.

Опубликовать в Одноклассники

Добавить комментарий