Башкортостан Республик гыч иза-шӱжар Яндар ден Эвика Маникаевмыт але йоча садыш коштыт. Тушто руш йоча коклаште жапыштым эртарат гынат, мӧҥгӧ пӧртылмекышт лач марла мутланат. Тыге иканаште кок йылмым пален кушкыт.
Яндар спорт дене кылым куча. Ончыч пел ий футболыш коштын, вара ача-авже борьбаш пуэныт. Тушкыжо рвезе, пандемий тӱҥалмешке, пел ий утларак коштын шуктен. Тыгак велосипед дене кудалышташ, куржталаш моткоч йӧрата. Пазлым, легом пога. Эвикалан пластилин дене модаш келша. Ӱдыр «Киндерсюрпризыште» кийыше изи курчак-влак гыч коллекцийым поген.
Кажне кастене ӱдыр-рвезе йомакым лудаш йодыт. Вара ты книга нерген мутланат.
Шукерте огыл ача-авашт дене пырля «Кеҥеж сылнымутчо-2020» семинарыш толыныт ыле. Тушто эртаралтше лекцийлаш, мероприятийлаш нуно чӱчкыдынак ушненыт. Семинарист-влак денат вашкылым куштылгын муыныт. Ару эрвел марий йылмышт дене чылаштым куандареныт.
О.МОШКИНА
