Марий кугыжаныш университетыште Российыште да вес эллаште илыше-влаклан марий йылме да тӱвыра дене палдарыме кеҥеж школ пашам ыштен.
Тений школыш Финляндий, Венгрий, Японий элла ден Москва ола гыч студент ден аспирант-влак толыныт. Нуно рӱдоланан театр ден тоштерлашкыже,марий газет редакцийлашке, Морко район Чавайнур ялыш С.Г.Чавайнын тоштер-пӧртышкыжӧ миен коштыныт. Морко районысо Изи Корамас школын лӱмгечыштыжат лийыныт, тыгак Унчо кӱсотышто марий кумалтышыш ушненыт.
— Те марий йылмым, тӱвырам арален кодымаште кугу пашам шуктеда. Калык-влак кокласе кылым вияҥдаш полшеда. Марий йылмым йӧратымыланда, тыланда моткоч кугу тау! – каласеныт марий йылме да тӱвыра школын пытартыш кечынже университетын ректоржо М.Швецов ден Калык культур ден культур-влак кокласе коммуникаций институтын вуйлатышыже Р.Чузаев.
Кок арня жапыште йот элын ӱдыр-эргыже-шамыч марий йылмынам, тӱвыранам лишкырак пален налыныт. Марий ялыште калык кочкышым тамленыт. Еҥ-влак дене мутланыме годым кутырымо йылмыштымат лывыртеныт.
— Мыланна Марий Эл, йылмыда, тӱвырада моткоч лишыл лийын. Калыкдат поро, унам вашлийын, ончен моштышо. Вес ганат тендан деке толаш кумыл уло. Ӱшанем, тиде пытартыш вашлиймаш огыл, вет мый марий йылмым умбакыжат шымлаш тӱналам, — мане Венгрий гыч толшо уна Богата Тимар.
Л.ШАБДАРОВА.
М.Скобелевын фотожо.
Снимкыште: Марий йылме ден тӱвыра школын тунемшыже-влак – «Марий Эл» газет редакцийыш унала мийымшт годым.
