КАЛАСЕ, "МАРИЙ ЭЛ"

«Марийжын пенсийже дене илен…»

Унала мийыме ял урем дене ошкылмо годым ик пӧртын капкаже ончылно колотка леведышым ужна. «Пеш шоҥго кова уке лийын, – рашемдыш автобус остановкыш вашлияш лекше родем. – А палет, тудо вет колышо марийжын пенсийжым налын илен», – ешарыш вара.

Тыгайым колын, изиш ӧрмалгышымат. Палынем ыле, родем мо нерген ойла?

Г.Исакова.

Шернур район.

 

Тиде йодышым Россий Пенсий фондын Марий Элысе пӧлкаштыже прессе дене пашам ыштыше А.Разумова рашемда:

– Тыште пукшышым (кормилец) йомдарыме шотышто пенсий нерген ойлалтеш. Тудым колышын пашам ыштен кертдыме лишыл еҥже-влаклан палемдат:

  • ийготыш шудымо але 18 ий деч кугурак, но ийготыш шумыж марте инвалид лийше йочажлан, пашам ыштен кертше ача-ава деч посна кодшо иза-шольыжлан, ака-шӱжаржылан, уныкажлан;
  • инвалидностьышто улшо але 65 ийым темыше ачаж ден 60 ийым темыше аважлан;
  • 14 ияш марте йочажым, пашам ыштен кертше ача-ава деч посна кодшо иза-шольыжым, ака-шӱжаржым але уныкажым ончышо ача-аваж кокла гыч иктыжлан, пелашыжлан, кочажлан але коважлан (ийгот ден пашам ыштен кертме-кертдыме шотыш огыт налалт), тыгак 18 ийым темыше иза-шольыжлан, ака-шӱжаржылан;
  • пашам ыштен кертдымылан шотлалтше-влакын закон почеш ончышо еҥышт деч посна кодмекышт – кочаштлан але коваштлан.

Тыгай пенсийым пукшышын кӱшеш илыдыме, но вараже колышо еҥын нимогай средства деч посна кодшо ача-аваж ден пелашыже налаш праван улыт.  

Илыш гыч кайыше пукшышын страховой пенсийжым шкенжын шоҥгылык шотышто пенсийже деч шӧрлышӧ (документ почеш нимогай средства деч посна кодшо) пелашыжланат палемдаш лиеш. Но страховой пенсийын ик видше гыч весыш куснымо годым колышо пелашын чумыр пенсийже огеш палемдалт. Тыгай пенсийын кугытшо илыш гыч кайыше пукшышын пенсийжын страховой ужашыже да пукшышым йомдарыме шотышто пенсийын страховой ужашышкыже пеҥгыдемдыме выплате дене кылдалтын.

М.ИВАНОВА  

Опубликовать в Одноклассники

Добавить комментарий