Финн-угор калык-влакын театрыштын «Майатул» ХII тӱнямбал фестивальыштын жюрижын резолюцийже
Йошкар-Ола, 2018 ий 14-18 ноябрь
Финн-угор калык-влакын театрыштын «Марий Театр Эл» театральный фестивальын кышкарыштыже эртаралтше «Майатул» ХII тӱнямбал фестивальышт Марий Эл Республикыште да финн-угор тӱнян кумда культур пространствыштыже чапле событийыш савырнен.
Фестивальыште Российысе финн-угор регион-влакын: Марий Эл Республикын, Коми, Мордовий, Карелий, Удмурт республике-влакын да Хант-Мансий АО-н 10 театральный коллективышт мастарлыкым ончыктеныт. Фестивальын афишышкыже Российысе калык-влакын 9 йылмышт дене шындыме 11 спектакльым пуртымо.
«Майатул» фестиваль эртыме кечылаште драматург-влакын творческий лабораторийышт пашам ыштен, жюри член-влак спектакль-влакым келгын лончыленыт да театральный коллектив-влакын профессиональный кугу кӱкшытыш шумыштым палемденыт.
Национальный пьесе-влакым сценыш лукмо проблемный йодыш-влакым ончен лекмек, финн-угор калык-влакын театрыштын «Майатул» тӱнямбал фестивальыштым, а тудыжо театральный искусствым вияҥдымаште, наций-влак кокласе да тӱнямбал кылым саемден толмаште, Российысе калык-влакын шочмо йылмыштым, традицийыштым да культурыштым арален кодымаште да вияҥдымаште пеш кугу пашам шуктен шога, эртарымаште М.Шкетан лӱмеш Марий национальный драме театрын кугу сай опытым погымыжым умылен, тыгак 2020 ийыште Российыште Марий Эл Республикын да Карелийын 100 ияш юбилейыштым пайремлымым шотыш налын, фестивальын жюриже ден участникше-влак
– финн-угор калык-влакын театрыштын шушаш «Майатул» тӱнямбал фестивальыштым чыла семынат поддержатлаш Российысе финн-угор регион-влакын, Эстонийын, Финляндийын, Венгрийын театрыштым ӱжыт;
– автор-влаклан полшен шогымо да нунылан семинар, лабораторий да мастер-класс-влакым эреак эртарен шогымо йӧн дене финн-угор калык-влакын йылмышт дене ышталтше театральный драматургийым чыла велымат вияҥдаш кӱлешлан шотлат;
– финн-угор калык-влакын театрыштын XIII «Майатул» тӱнямбал фестивальыштым 2020 ийыште Марий Эл Республикыште эртараш Марий Эл Республикын Правительствыжым ӱжыт.
Финн-угор калык-влакын театрыштын XII «Майатул» тӱнямбал фестивальыштын жюрижын членже-влак участник-влак лӱм дене:
Александр Александрович Вислов, театровед, театральный критик, «Золотая маска» премийын Эксперт советшын Председательже (2017/2018)
Валентина Борисовна Фёдорова, театровед, театральный критик, «Вахтанговец» газетын тӱҥ редакторжо, Башкортостан Республикысе культурын заслуженный пашаеҥже
Борис Наминович Манджиев, РФ Театральный пашаеҥ-влакын ушемыштын секретарьже, РФ Театральный пашаеҥ-влакын ушемыштын республик-влак шотышто советшын председательже, Калмыкий Республикын Б.Басангов лӱмеш Национальный драме театржын художественный вуйлатышыже, Российысе да Калмыкий Республикысе искусствын заслуженный деятельже
Кирсикка Моринг, театральный критик, «Хельсинкин Саномат» газетын культур отделжын журналистше (Финляндий)
Дина Гатуевна Давлетшина, театровед, Башкортостан Республикысе искусствын заслуженный деятельже
Нина Аркадьевна Ефимова, театровед, театральный критик, Россий культурын заслуженный пашаеҥже
Нияз Рауфович Игламов, театральный критик, Г.Камал лӱмеш Татар кугыжаныш академический театрын литературно-драматический ужашыжым вуйлатыше, «Золотая маска» премийын эксперт советшын членже
