Кажне ийын Йӱдвел кундемыште, Мурманскыште, шошын икымше тылзе мучаштыже, кугу спорт пайрем эрта. Тушто эн тӱҥжылан ече дене марафон шотлалтеш. Стартыш тӱрлӧ ийготан, профессиян, профессионал-спортсмен, ечым йӧратыше тыглай еҥ, икманаш, моткоч шуко калык лектеш.
Теният тыгак лийын. Марий Эл гычат ечызе-влак миеныт, сай результатым ончыктеныт, тӱрлє кужытышто призёр радамышкат логалыныт. Тидын нерген газетыште возенна ыле. Палдарыме шуэш: спортсмен-влак деч посна тушко судья сомылым шукташ республик гыч И.Сотникова коштеш. Звенигово районын ӱдыржо Инна Геннадьевна тений латикымше гана «Йӱдвел пайремыш» миен. Мӱндыр кундемыште латкок кече лийын.
– Мыланем ты паша келша. Кушко ӱжыт – каяшак тыршем. Кажне гана у шарнымаш кодеш. Лӱмлӧ, тӱнямбал кӱкшытыштӧ чапланыше спортсмен-влак дене палыме лияш – сай йєн. Тений областной спорткомитетын вуйлатышыже Светлана Наумова ӱжын. Ты гана «Йӱдвел пайрем» деч посна Апатитыште Владимир Беляевым шарныме лӱмеш таҥасымашым судитлаш логалынам, – ойла Инна Сотникова. – Чылажат сай кӱкшытыштє эртен. Такшым чыла сай лийын ок керт. Сандене лекше чаракым жапыштыже кораҥдаш тыршена. «Йӱдвел пайремыште» спортын моло тӱрлӧ видше денат оҥай таҥасымаш-влак эртаралтыныт. Тыге эре ик верыште лийме деч еҥ дене палыме лияш, кутыраш келша, сандене тыгай тӱшкашке лектам. Молыланат йєн лийме семын шке илышыш могай-гынат вашталтышым пурташ, таза илыш-йӱлам кучаш темлем.
Мӱндыр кундемыш судья сомылым шукташ миен толашыже полшымыштлан И.Сотникова «Звениговский» шыл комбинатлан, Марий Эл Кугыжаныш Погын депутат Е.Кальяновлан моткоч кугу таум ышта.
Е.Эшкинина.
Фотом И.Сотникован еш архивше гыч налме.
