ОБРАЗОВАНИЙ ӰДЫРАМАШ КОРНО

Лӱмгече: «Пашамын лектышыжым ужаш моткоч куанле»

Людмила Кошкина 7 октябрьыште 60 ияш лӱмгечыжым пайремла.  Илыш пӧрдемыште лым лийде тыршымыжлан, мер пашаште чолгалыкым ончыктымыжлан кӧра тынар ийготым нигузеат от пу.  Тудо кызыт «Саскавий» марий  ӱдырамаш ушемым вуйлата, Марий тӱвыра рӱдерыште пашам ышта. Шкеже  Кемерово область Междуреченск олаште шочын. Йоча да самырык пагытше Кужэҥер районысо Окашьялыште эртен. Таче ме тудын дене шкеж нерген огыл, а марий йылмым туныктымо йодыш йыр мутланена. 

— Ӱмырдам образований дене кылденда. А такше Те вет тӱҥалтыште культур институтыш пуренда?

— Коҥганур кыдалаш школ деч вара Казаньысе тӱвыра институтыш тунемаш пуренам, ик ий тунеммеке, Марий кугыжаныш пединститутыш кусаралтынам. Тӱҥалтыш класслаште туныктышылан тунем пытарымеке, Советский район Алексеевский кыдалаш школыш пашаш колтышт. Варажым Советский, Кужэҥер поселкыласе школлаште туныктенам.1989 ийыште ешем дене Йошкар-Олаш илаш толынна.Тудо пагытыште туныктышылан паша верым муаш моткоч неле ыле. Рӱдоласе образований пӧлкан тунамсе вуйлатышыже Йошкар-Оласе 28-ше №-ан школышто марий йылмым туныкташ темлен. 

Тунам марий йылмым туныктымо паша лачак воранен толын. Ты школышто марий классым почаш шоненыт, но 1 сентябрь марте марий йоча-влак погынен шуын огытыл, сандене 24-ше №-ан йочасадышке икшыве-влак деке марий йылмым туныктышо семын пашаш тольым. Дошкольный образований системыште икымше марий йылме туныктышо лийынам. Тушто 2000 ий марте тыршенам. Варажым 22-шо №-ан йочасадыш вонченам, икмыняр жап гыч Марий образований институтыш пашаш ӱжыныт да тушко кусненам. Йочасадлаште да национальный школлаште тӱҥалтыш класслаште марий йылмым туныктымо йодышлан вуйын шогенам. Тиде жапыштак йочасадыште ӱдыр-рвезе-влакым марий йылмылан шӱмаҥденам, туныктенам.

Марий кугыжаныш пединститутыштат, университетыштат лекцийым лудынам, воспитаний паша шотышто пӧлкам вуйлатенам. Студент-влак дене шуко тӧрлӧ паша ышталтын. Ик эн кугу лектышан пашалан финн-угор студент-влакын ассоциацийым ыштымым шотлаш лиеш. Тиде шонымаш Карелийыште, Петрозаводск олаште, финн-угор университет-влак ассоциацийын черетан вашлиймаштыже шочын. Марий кугыжаныш университет асоциацийын енже-влак ончылно студент- влак дене воспитательный пашам ворандарен колтымо шотышто мутым кучен да вес погынымашыш студент-влакымат ушаш темлен. Тиде вашлиймаштак Финн-угор студент-влакын I  тӱнямбал Форумым эртараш кутырен келшыме. Тыге 2013 ий 26 апрельыште Марий кугыжаныш университетыште финн-угор студент-влакын икымше кугу вашлийымашышт эртыш. Тунамак финн-угор студент-влакын ассоциацийышт шочо. Кызыт ты паша университетыште умбакыже вияҥеш, сандене мыланна сомылнан кугу лектышыжым ужаш моткоч куанле.

— Тендам йочасадыште марий йылмым туныктымо пашалан тӱҥалтышым пыштышылан шотлаш лиеш?

— Ну, негызым пыштышыжак омыл. Шке жапыштыже Марий Элын Образований да науко министерствыштыже Людмила Николаевна Кудрявцева национальный региональный компонент дисциплинылан вуйын шоген да пеш кугу надырым пыштен, Марий кугыжаныш пединститутышто дошкольный факультет почылтын. Деканже Наталья Сергеевна Морова лийын. Факультетыште марий йылмым тунемыныт. Тудын  студентше-влак Йошкар-Оласе 29-ше №-ан йочасадыште Зоя Константиновна Иванова дене пырля марий йылмым туныктымаште икымше ошкылым ыштеныт.

 

Кумданрак — «Марий Эл» газетын
2017 ий 7 октябрьыште лекше номерыштыже лудын кертыда.

Лидия ШАБДАРОВА.
М.Скобелевын фотожо.

Опубликовать в Одноклассники

Добавить комментарий