УВЕР ЙОГЫН

Лӱмгече вашеш — медаль

Марий Элыште Мусульман-влакын региональный духовный управленийыштым ыштымылан 20 ий темын. Тиде амал денак Йошкар-Олаш Российысе мусульман-влакын рӱдӧ духовный управленийжым вуйлатыше Шейх-уль-Ислам Талгат Сафа Таджуддин толын коштын.

Тудын дене Марий Элым вуйлатыше А.Евстифеев вашлийын. Александр Александровичын ойлымыж почеш, республикыште тӱрлӧ конфессиян еҥ-влак ваш келшен илат. Таклан огыл 2017 ийыште Россий Президент пеленысе калык-влак кокласе кыл шотышто советын заседанийже мемнан дене эртаралтын. Мусульман-шамычат тыште шукын илат. Верховный муфтий республикыштына религий шотышто умылыдымаш укелыкым палемден. Тидыже ты кундемыште тӱрло верам  кучышо-влакын ваш умылен илымышт нерген ойла. «Марий Эл ты шотышто  шочмо элнан ик эн ласка республике», — каласен тудо.

 Вашлиймаш годым мусульман верам вияҥдыме дене кылдалтше икмыняр йодышым каҥашеныт. Ончыкыжымат тӱрлӧ верам кучышо-влак икте-весылан полшаш, ласкан илыме верч тыршаш, религийлан эҥертен, тӱрлӧ социумын еҥже-шамычлан полшымо дене кылдалтше ойпидыш-влакым ыштыме нергенат ойленыт. Религий шӱлышан организаций ден министерстиве да ведомство-влак коклаште тыгай ойпидышым ыштыме пашаже республикыште сайын вораҥеш, палемден регион вуйлатыше.

Мучаште А.Евстифеев Талгат Таджуддинлан «За заслуги перед Марий Эл» орденын медальжым кучыктен.

Марий Эл Республик вуйлатышын организаций да аналитике виктемыжын уверже негызеш С.Носова ямдылен.

Д. Речкинын фотожо.

Опубликовать в Одноклассники

Добавить комментарий