УВЕР ЙОГЫН

Лӱдыкшыдымӧ да сай илыш верч

Марий Элыште коммунальный инфраструктурым кумдан модернизоватлыме дене калыклан пуымо услугын качествыже палынак саемеш.
18 мартыште Марий Элым вуйлатыше Александр Евстифеев Россий правительствын регионысо вияҥмаш шотышто комиссийжын президиумжын заседанийыштыже участвоватлен. Тудым правительстве председательын алмаштышыже Марат Хуснуллин видеоконференций йӧн дене эртарен.
Заседанийыште элнан субъектлаштыже илыме-коммунал озанлыкын состоянийже, шыже-теле пагытым эртарыме дене кылдалтше йодышлам лончыленыт, тыгак ЖКХ аланыш частный инвестицийым ышташ кумылаҥдыме сай опытым каҥашеныт.
М.Хуснуллинын мутшо почеш, эртыше ийын корным чоҥымо аланым 20 процентлан шукырак инвестироватлыме да планым тӱргоч темыме. Минстрой эше 3800 обязательный йодмашым кораҥдыме нерген документын проектшым ямдылен, да май гыч чоҥымо пашаште обязательный семын палемдыме 58 процент йодмаш темлыме шотан гына лиеш. Профессионал ден тидым умылышо-влаклан чоҥымо пашам простаҥдаш, писемдаш да шулдештараш кугу йӧн ышталтеш.
Таче Марий Эл правительстве ончылно шогышо тӱҥ задаче-влак кокла гыч иктыже калыклан лӱдыкшыдымӧ да сай илышым ыштыме дене кылдалтын. Тидланже коммунальный инфраструктурым комплексно модернизоватлыме да ЖКХ аланышке бюджет системын средстваж ден частный инвестицийым кондымо паша шукталтеш.
Республикна федеральный программе ден национальный проект-влакым илышыш пуртымаште чолган участвоватла. Козьмодемьянск олаште коммунальный инфраструктурым модернизоватлымыж дене Россий Минстройын кугу федеральный проектшым илышыш пуртышо регион-влак коклашке логалын да тиде пашалан 400 млн. наре теҥгем налын. Пашан икымше йыжыҥжым мучашлыме. Тылеч посна 2021-2023 ийлаште Йошкар-Олаште да Волжскышто кок канализаций коллекторым, рӱдолаште канализаций станцийым, Советский, Морко да Оршанке районлаште эрыктыме сооруженийым чоҥаш да уэмден олмыкташ палемдыме. Чумыр пашалан 685 млн. теҥгем кучылташ шотлен лукмо. Ӱмаште «Юлым тазаҥдымаш» федеральный проект кышкарыште Марий Турек районышто эрыктыме сооружений пашам ышташ тӱҥалын. Тений Йошкар-Оласе эрыктыме сооруженийым уэмден олмыкташ тӱҥалме.
ЖКХ аланыш инвестицийым ышташ кумылаҥдыме йодышым рашемдаш гын, Марий Элыште вӱдым пуымо, йоктарен колтымо да шокшым ситарыме объект-шамыч шотышто куд концессионный соглашений шукталтеш. Инвестицийын кугытшо – 206 млн. теҥге.

Марий Эл Республикым вуйлатышын организаций да

аналитике виктемжын уверже негызеш

М.ИВАНОВА ямдылен

Опубликовать в Одноклассники

Добавить комментарий