Общественный транспорт дене кудалыштымылан пенсионер ден тунемше-влаклан муниципал льготым пӧртылтымӧ нерген документын проектшым «Йошкар-Ола» ола шотан округын Депутат-влак погынымашыжын 10 мартыште эртыше черетдыме сессийыштыже ончен лектын.
Йошкар-Олаште троллейбус дене кудалыштмылан муниципал льготым кум тылзе (2017 ий 1 январь гыч 31 март марте) жаплан чареныт. Депутат-влак 2017 ий 1 апрель гыч шоҥгеммылан кӧра паша пенсийым налше, федеральный ден региональный закон почеш льготдымо шоҥгыеҥ-шамычлан (республикын рӱдолаштыже илыше 60 ийыш шушо пӧръеҥ ден 55 ийым темыше ӱдырамаш-влак) да «Йошкар-Ола» ола шотан округысо муниципал общеобразовательный учрежденийлаште кечывалым тунемше йоча-влаклан общественный транспорт дене кудалышташ проездной билетым налме годым льготым пуа.
Ик тылзылан проездной билетым налме годым шоҥгемме шот дене сулен налме канышыш лекше-влаклан муниципал льготын кугытшо 100 теҥге лиеш, тунемше-влаклан – 260 теҥге.
Тиде льгот дене пайдаланышашлан пенсионер-влаклан проездной билетым ужалме верлаште «Марий Эл Республикысе Йошкар-Олаште калыклан социальный полышым пуымо рӱдер» ГКУ-што (адресше: Йошкар-Ола, Советский урем, 181-ше №-ан пӧрт) тудын федеральный да республиканский регистр почеш льгот дене пайдаланыдымыж нерген налме справкым, пенсионерын удостоверенийжым але пенсионерын статусшым пеҥгыдемдыше справкым ончыктышаш.
Тунемше-шамыч школышто тунеммыштым пеҥгыдемдыше справкым ончыктышаш улыт. Проездной билетым тунемшын ачаже але аваже налеш гын, пеленже ача-аван личностьшым пеҥгыдемдыше документше лийшаш.
