Рушарнян, 10 октябрьыште М.Шкетан лӱмеш Марий национальный драме театрыште «Оскар и Розовая дама» (Э.Шмитт) спектакльын премьерже лиеш.
Постановко мо нерген да кӧмыт тушто модаш тӱҥалыт? Нине да моло нерген кодшо кечылаште спектакльын режиссёржо Сергей Васин, артист-влак Маргарита Медикова ден Генрих Тимиряев каласкалышт.
– Самырык тукымым театр искусствылан шӱмаҥдыман. Тидым шотыш налын, келшыше пьесым ойыренам. Шмиттын творчествыже мылам лишыл. Тудын произведенийже-влак тачысе илышлан келшен толшо темым тарватыше, келге шонымашан, чоным вургыжтарыше улыт. «Оскар и Розовая дама» эпистолярный роман икмыняр ий ончычак кидышкем логалын. Тудын негызеш постановкым шындаш шукертсекак шонен коштынам, – мутланымашым тӱҥале С.Васин.
У спектакль ямдылалтме нерген пален налмеке, ушышто вик йодыш пӧрдеш: «Кӧмыт тушто модаш тӱҥалыт?» Режиссёр Сергей Владимирович ты театр дене кылым икмыняр ий ончыч ыштен. Тиддеч ончыч театрын йолташыже-влак тудын шындыме «Короткий день» постановкым ужыныт. А таче шындыме спектакльыште Оскарым Генрих Тимиряев, а Розовая дамам Маргарита Медикова ден Светлана Гладышева модыт, тыгак Алина Егошинан, Олег Кузьминыхын, Алексей Юнусовын рольышт уло.
Произведенийыште лу ияш йочан капкыл дене веле огыл, а кӧргӧ чон-поянлык дене кушмыжо, тудын шинчаончылтышыж ден шонымашыже вашталме… нерген ойлалтеш. Рвезе черле, тудлан 12 кече веле илаш кодын. Розовая дама Оскарым ик кечыжым лу ий илыме семын илаш туныкта. Рвезе ушанрак, чолгарак лиеш. Эн чотшо тудлан Юмылан серышым возымыжо полша.
– Сергей Владимирович дене пашам ышташ келша. Тудын ойырен налме произведенийжат ойыртемалтше, тыгай шотан постановко самырык-влаклан моткоч кӱлешан, – чонжым почо Российын сулло, Марий Элын калык артистше Маргарита Медикова.
– Кунам айдеме шканже огеш ӱшане, тунам тудо илышыште тышке-тушко «лӱҥгалтеш». Садлан ӱшан эреак лийшаш, – ешарыш Генрих.
Спектакльым театрын цех-залыштыже ончыкташ ямдылат. А тушто, ме палена, артист ден ончышо шинчаваш улыт. А тидыже икте-весым шижаш, сайынрак умылаш полшышаш.
– Ты сценыште артист йӧршын вес семын «ила», сандене тушто модаш пеш келша, – каласыш Маргарита Егоровна.
Чынжымак, тиде залыште шӱлышыжак весе. Теве, мутлан, режиссёр да артист-влак дене мутланыме годым ик татлан йоча жапыш пӧртыльым. Сӱретче Анастасия Чубукова лач тыгай сценым тиде спектакльлан сӱретлен, келыштарен. Тудо ошо-шеме тӱс-влакым кучылтын.
Спектакль ойго ден нелылыкым сеҥен лекташ да ончыко волгыдо ӱшан дене каяш туныктышаш маныт. Сандене тыгайым ончыде кодманак огыл.
А.БАЙКОВА
Авторын фотожо
