УВЕР ЙОГЫН

Лум лумеш ший пырче гай, Кож коеш – мотор тугай!

24 декабрьыште Республикысе курчак театрыште Марий Эл вуйлатышын ёлкыжо лийын.  

Тыгай сынан пайрем тений 20 ден 21 декабрьыштат эртен. Тушко тунеммаште, спорт таҥасымаште, конкурсышто ойыртемалтше йоча-шамыч погыненыт. А кумшо ганаже тушко сайын тунемше, олимпиадылаште, конкурслаште усталыкыштым ончыктышо марий ӱдыр-рвезе-влак чумыргеныт. Йӱштӧ Кугыза ден Лумӱдырын саламлымашыштым налаш Марий Элын чыла районжо гыч 120 икшыве чумырген.

Нуным Марий Эл вуйлатышын лӱмжӧ дене правительстве председательын  икымше алмаштышыже М.Васютин саламлен. Тыгак ятыр поро тыланымашым  образований да науко министр Н.Адамова, тӱвыра, печать да калык-влакын пашашт шотышто министрын алмаштышыже Г.Ширяева, Оньыжа Э.Александров  каласеныт да тамле пӧлекым кучыктеныт.

Ладыра ужар кож воктене йоча-влакым ӱмашсе идалыкын озаже Агытан ден тенийсе оза Пий вашлийыныт. Нуно икшывым тӱрлӧ модыш дене модыктеныт. Но Вуверкува ден Лум чумырка, У ий пайрем ынже тол манын, ӱчым ыштылыныт, шойыштыныт, эсогыл кожыш тулым пижыктеныт. Пайрем пушеҥге йӱлаш тӱналын, а кож йымалне мален кийыше  изи сӧснаиге, шикш пушым шижын, лӱдмыж дене помыжалтын. Тудым Агытан ден Пий лыпландареныт, а Сӧснаиге юзо тояж дене тулым йӧртен кертын. Тудлан Ош Маскат полшен.

Вара чыланат Йӱштӧ Кугыза ден Лумӱдырым ӱжыныт. Коча ден уныкаже шкеныштым кужун вучыктен огытыл. Нунын дене пырля икшыве-шамыч ятыр модыш дене модыныт. Шукыштлан Йӱштӧ Кугызан кидым, шӱргым, пылышым, нерым кылмыкташ тӧчымыжӧ келшен. Иман мотор воктене тавалтымеке, Йӱштӧ Кугыза ден Лумӱдыр «Эн сай У ий открытке» конкурсышто сеҥыше-влакым палемденыт. Тыге кумшо верым Шернур район Кукнур школ гыч Ирина Алгаева, кокымшо верым Йошкар-Оласе 27-ше №-ан школ гыч Софья Москвичёва налыныт. А сеҥышыш Советский район Кодам школын  тунемшыже Юля Васиярова лектын. Вара чыланат «Щелкунчик» йомакым  онченыт.

–  Мылам республикнан тӱҥ ёлкыштыжо лияш моткоч куанле. Палем, тыгай пайремыш логалаш манын, идалык мучко тыршыман. Сандене вес ийынат сайын тунемаш товатлем.«Эн сай У ий открытке»   конкурслан пашам икмыняр кече ямдыленам. Тений сеҥымашем уло. Мый  Марий Элын шочмо кечыжлан пӧлеклалтше  оласе конкурсышто  почеламутым сайын лудмемлан кумшо верым налынам. А марий ёлкыш авам сӧснаигын костюмжым урген пуэн, мылам тудо пеш келша,  –  мане Йошкар-Оласе 2-шо №-ан школышто 6-шо классыште тунемше Эвелина Антропова.

Марий Элын ӱдыр-рвезыже-шамычлан тыгак Кремльысе ден Юл кундемысе федерал округын ёлкышкышт логалаш пиал шыргыжалын. Нуно 26 декабрьыште эртат. Кок вережат республикна гыч 9-13 ияш 56 йоча (кажныштыже 28 еҥ) кая. Пайремыш республикысе, регион кокласе, российысе олимпиадылаште сеҥыше, тӱрлӧ конкурсышто, фестивальыште, спортышто усталыкым ончыктышо икшыве-шамыч погынат. Тылеч посна икмыняр икшыве Россий Просещений министерствын ёлкыштыжо У ий кож йыр мурен-кушташ тӱҥалеш.

Л.ШАБДАРОВА.

М.Скобелевын фотожо.

Опубликовать в Одноклассники

Добавить комментарий